WABAG Daiosis long Enga Provins i redi long amamasim 75 yia bilong Sosaiti ov Divine Word (SVD) misineri i kamap na statim wok bilong sios, long Ogas neks yia.

Daiosis pastoral kodineting tim i bin pasim tok long amamasim dispela bikpela mak bilong sios long Enga.

Daiosis i kamapim wanpela jubili komiti long go pas long program bilong amamasim dispela de.

Ol i askim ol tripela dineri bilong daiosis long kisim ol toktok na stori bilong peris bilong ol.

Daiosis kodineta bilong media na komyunikesen bai bungim dispela stori, nius na poto na putim long wol o banis bilong sios bilong ol.

Ol i redi tu long bung wantaim ol pater, bruder na sista long Madang na amamasim dispela de.

“Stat long taim Sosaiti ov Divine Word misineri i kam sua long Papua Niugini long 125 yia i go pinis, mipela i laik bung wantaim ol na amamasim dispela de long neks yia long 2022,” Pater Justin Ain, man husat Pop Francis i makim long kamap oksileri (helpim) bisop bilong Wabag Daiosis i tok.

“Mipela i kaikai bilong dispela hatwok ol i bin mekim na i laik pilim olsem mipela i hap bilong dispela amamas,” Pater Justin i tok.

“Mipela i las bilong ol SVD misin provins na mipela i mas givim luksave na tok tenkyu long ol.

“Bikos mipela i las bilong ol SVD provins, mipela bai amamas long kisim moa SVD misineri.”

Arere long bikpela wok bilong SVD long ivanjelaisesen, ol i save kamapim ol arapela sevis olsem helt, edukesen, rot infrastraksa na bris, bisnis na komyunikesen.

Sampela ol nesenel samting em SVD i wokim na i stap em Divine Word Yunivesiti long Madang, Wantok Niuspepa na Tok Pisin diksineri i.