WABAG Katolik Daiosis long Enga Provins bai mekim moa wok bilong traim helpim long stretim ol hevi ol pipel i wok long bungim long laip bilong ol. Pater Justin Ain, nupela oksileri o helpim bisop bilong Wabag Daiosis, i tok.

Em i tok ol hevi i save kamap long sindaun bilong ol pipel, i wok long go bikpela long dispela taim.

Em i tok long las tripela o foapela yia i kam, planti hevi olsem paitim na bagarapim ol meri na pikinini na famili i bruk, i wok long go bikpela.

Pater Newman i mekim dispela tok long taim ol pater, relijus na daiosisen kodineta bilong daioisis i bung long namba wan konprens bilong ol long Par Pastoral Senta long tupela wik i go pinis.

Long dispela bung tu, ol i bin tokaut tu long 5-yia buklet plen bilong daiosis.

“Long ol yia i kam, mipela i wok long lukim planti ol hevi i pas long sindaun bilong pipel olsem kros pait long famili, famili i bruk na ol pikinini i no sindaun gut.

“Dispela em ol taim nogut we wol i wok long lukim ol hevi pas tru long laip bilong ol manmeri.”

Pater Justin i tok wok tru bilong ol olsem wok manmeri bilong Bikpela em i bilong Ivanjelaisesen o autim tok bilong Bikpela.

Em i tok dispela i no inap long lus. Dispela bai stap olsem yet.

Em i tok lukluk bilong daiosis long neks 5-pela yia bai stap long sosel isu, tasol wok bilong ivanjelaisesen bai bikpela rot yet ol bai yusim long stretim sampela bilong ol dispel hevi.

Pater Justin i tok Caritas opis insait long daiosis yet i bin kisim askim long go pas long ol rot bilong stretim ol hevi i pas long sosel isu.”

Em i tok insait long dispela tim bai i gat wanpela pater, sista na seminarien na lei manmeri.

Ol bai mekim ol awenes long toksave long ol sosel isu i pas long laip bilong manmeri.

Ol kodineta i tok maski ol i bungim planti salens, ol i bin inap long plen na pinisim gut wok bilong ol wantaim gutpela tingting.

Konprens i pinis wantaim ol toktok bilong amamasim 75 yia jubili selebresen long neks yia.

Pater Newman Kingi i raitim