DISPELA graun bai i pinis, na olgeta pasin bilong dispela graun, em ol pasin bilong bel kirap na aigris, ol tu bai i pinis wantaim.

Tasol man i bihainim ol tok bilong God, em bai i stap oltaim. 1 John 2:17

Klostu long wanpela haus fam wanpela liklik maunten i stap, na klostu long maunten wanpela liklik diwai i drai pinis em i redi long katim paiawut. Wanpela liklik pisin i kam statim haus bilong em insait long dispela paiawut. Fama i lukim na kwiktaim em i seksekim diwai na rausim ol samting pisin i bin karim i kam bilong wokim haus. Pisin i go pinis, tasol namba tu taim em i kam bek gen na wokim haus long dispela ples na fama i rausim em gen. Nau pisin i flai i go antap long wanpela diwai i antap moa na i sanap strong tru, na em i wokim haus long dispela hap. Fama nau i no bagarapim haus bilong em gen.

Bilong wanem na dispela fama i givim hatwok long pisin na i no larim em i ken wokim haus insait long dispela paiawut?

Em i save, i no longtaim bai em i katim dispela diwai na putim long paia na bai haus bilong pisin i paia olgeta. Olsem na em i no laik larim pisin i hatwok nating, na bihain ol pikinini bilong en i kisim bagarap.

Yumi man tu yumi mas klia bai yumi sanapim haus bilong yumi we. Bai yumi wokim antap long ples ston o wesan bilong nambis? Buk Baibel i tok long Mt 7:24 “Orait man i harim dispela tok bilong mi na i bihainim, em i olsem man i gat gutpela tingting, na em i wokim haus bilong em antap long ples ston.

Nogut ol samting bilong graun i kalabusim yumi na i stap nambawan long laip bilong yumi. Ol samting bilong graun bai i pinis. Aposel Pol i tok, “Ol man i save mekim wok long samting bilong graun, ol i mas i stap olsem dispela wok i no bikpela samting long laip bilong ol. Yumi save, i no longtaim na bai dispela graun wantaim olgeta samting em bai pinis.” 1 Korin 7:13

Sapos God i baragapim samting long laip bilong yumi orait yumi no ken kirap nogut. Ating dispela samting i no inap helpim yumi na i laik pulim yumi i go longwe long God. Olsem na God i save rausim. God i save laikim yumi tru na em i laik yumi ken winim resis na kamap long mak. Olsem na em i save skulim yumi na stretim yumi.

Buk Baibel long Hibru 12: 11 i tok “Taim Papa i givim hevi long yumi bilong stretim yumi, yumi no save amamas. Nogat. Bel bilong yumi i pilim hevi tasol. Tasol taim em i stretim yumi pinis, yumi bai kisim gutpela pasin tru. Yumi bai mekim ol stretpela pasin, na bel bilong yumi bai i stap isi.”