FOAPELA yangpela Katolik man i bin lusim ples bilong ol long Wewak Is Sepik na wokabaut wantaim bikpela tingting bilong bungim ol famili gen.

Long mun Me ol i bin kamap long Pot Mosbi bihain long ol i wokabaut tripela de long Kokoda long Oro Provins i kam olsem.

Wokabaut bilong ol i bin stat long St Paul’s Katolik peris, Boiken long Wewak na i go long Madang, Lae, Popondetta na bihain Pot Mosbi.

Bikpela wok ol i mekim em long prea wantaim ol famili long Boiken husat i stap long ol dispela taun na long helpim ol long tingim Krais Jisas na bung gen olsem famili.

Namel long dispela wokabaut wanpela i mas go bek long ples hariap long wanem em yet i kisim hevi long famili. Tasol tripela em; Nathan Misai, Victor Kilogo na Marcellin Sauni i stap tripela wik na bung wantaim ol famili long Pot Mosbi na bihain ol i go olsem long Goroka na Madang.

Makim grup, Nathan Misai i tok, grup i wokabaut long wanem ol i lukim planti famili i bruk na ples i bagarap na ol i hop olsem insait long ol famili prea bilong ol, ol famili i ken kamapim wanbel, stap wanbel na kirapim bek ol ples bilong ol.