RYAN Marshall i nupela bisop bilong Asebli ov Jisas Krais sios (ALJS) long Maun Hagen.

Em i kisim ples bilong Reveren Rick Barnet.

Barnet husat i bin stap lida bilong sios long las 19 yia bai go bek long kantri bilong em long Amerika.

Ol bilip manmeri bilong sios i bin sori tru long lukim Barnet i lusim kantri.

Tasol em i strongim tingting bilong ol na i tokim ol long sanap strong long bilip bilong ol.

Em i tok ol i mas harim na bihainim tok na skul bilong Bisop Ryan olsem ol i bin bihainim tok bilong em.

Em i tok sios i bilip na lukluk long Bikpela Jisas Krais olsem sevia bilong ol na sanap long dispela bilip.

Pasto Thomas Eling, asisten bisop bilong sios i makim maus bilong sios na i tok tenkyu long wok na skul bilong Bisop Barnet.

Em i tok bilip bilong long Papa God na Jisas i no inap stap olsem sapos Bisop Barnet i no bin go na skulim ol.

Em i strongim tingting bilong Bisop Barnet na i tok ol bai holim yet bilip bilong ol long Jisas na skul bilong em.

Yut lida, Morris Poiya, i tok ol yangpela i bin amamas long wok aninit long em.

Em i tok ol i kisim ol gutpela skul na bai sori long ol taim em i go bek long kantri bilong em.

“Wankain olsem God i bin makim aposel Paul long go na autim tok bilong em, yu bin harim na bihainim dispela singaut bilong em na givim skul bilong Jisas i kam long mipela.

“Mipela i sori olsem yu lusim mipela tasol mipela i amamas olsem mipela i bin lainim ol gutpela skul long yu.

“Mipela i pre olsem God i ken blesim yu na wokabaut bilong yu taim yu go bek.”

Hoffman Gulgarye i raitim