INSAIT long Katolik sios, sapos yu laik baptaisim pikinini bilong yu, yu save painim was santu bilong Pikinini.

Yumi no makim nating nating. Yumi mas save gut pastaim long laip stori bilong dispela Santu, long pasin na spiritual laip bilong em.

Bikos yumi laik bai pasin bilong em i ken givim strong na inspiresen long pikinini bilong yumi. Yumi laik bai laip bilong pikinini i mas bihainim pasin bilong dispela santu.

Wankain tu long taim yumi laik kamapim wanpela Daiosis o Peris o liklik kommyuniti.

Yumi save makim wanpela Santu bilong lukautim na helpim yumi. Na olgeta yia long tingim de o pestode bilong was santu, yumi save selebretim wantaim lotu na bung kaikai.

Las wik Sarere, 12 Jun 2021, Katolik manmeri bilong St. Mary’s Peris insait long Goroka Taun i bin amamasim de bilong Was Santu bilong peris bilong ol, em i SANTU HAT BILONG MARIA o long tok Inglis ol i kolim IMMACULATE HEART OF MARY.

Dispela pestode i save kamap olgeta yia long namba tu Sarere bihain long bikpela pestode bilong Pentekos.

Long dispela yia de bilong em i kamap long Sarere, 12 Jun.

Long wik de, manmeri bilong St. Mary’s Peris i wok hat long redim kain kain samting, spiritual na narapela samting bilong mekim Pestode bilong Peris i kamap nais.

Ol i statim wantaim Santu Misa long 10 klok moning na pinis long 11:15am.

Haus Lotu i pulap wantaim planti manmeri i kam na selebretim dispela sepesel de bilong Peris. Em i gutpela long bung na wok wantaim.

Peris Pris bilong St Mary’s, Pater Paul Liwun SVD, husat i raitim dispela stori, em i go pas long Santu Misa wantaim tupela SVD Pater, em i Pater Itzo Duka SVD, asisten peris pris bilong St. Mary’s na i save lukautim quasi peris bilong St. Joseph Lopi.  Narapela Pateri bin stap wantaim em i Pater Romeo Yadao SVD, seketeri bilong SVD Provins long Papua Niugini.

Long skul bilong em, Pater Paul i bin tok amamas, bikos St. Mary’s Peris i olsem Holi famili. Bikos insait long St. Mary’s Peris i gat Santu Maria (was Santu bilong peris/mein Stesin), na Santu Joseph (was Santu bilong Quasi Peris Lopi), Santu Hat bilong Jisas na Divain Mercy – em i was Santu bilong Fanyufa autstesin na Bihute Austesin.

Olsem famili bilong Nazaret, yumi stap na wok wantaim long developim spiritual na fisikal bilong peris na autstesin.

Pater Paul tu i tok, yumi Katolik yumi mas amamas, bikos yumi i gat wanpela Mama, em i Santu Maria i holi na i save was long yumi taim yumi kamap long pes bilong em.

Planti taim Santu Maria i bin prea wantaim yumi na i bringim prea bilong yum i go long Jisas na God Papa. Na planti prea bilong yumi, God i bin bekim long taim bilong em yet.

Lotu i kamap nais bikos planti manmeri i bin putim han wantaim long mekim de i kamap gut. Bihain long Santu Misa mipela i go het wantaim bung kaikai (mumu) na danis na singsing bilong amamasim narapela. Pikinini, yangpela, namel na lapun i amamas long dispela bikpela pestode de bilong peris long dispela yia.

Yumi amamasim pestode bilong was Santu bilong peris em i helpim yumi long kamap wan na strongim bilip bilong yumi long God Papa i strong olgeta.