BISOP Geoffrey Kaman Koane, em i nupela presiden bilong Ivanjelikal Luteran Sios (ELC) PNG long Jiwaka distrik.

Em i kisim ples bilong asisten bisop Kaige Mottoro.

Bisop Koane i kisim dispela sia bihain long ol ELC pasto long Jiwaka i makim em long bung bilong ol long las wik.

“Mekim wok bilong Bikpela na lukautim ol sipsip bilong em i no liklik samting,” Bisop Koane i tok.

“I gat planti salens na traim long dispela wok.

“Mi yet i no inap long mekim gut wok. Mi nidim sapot bilong komyuniti.”

Bisop Koane i tok em i putim em yet long han bilong Bikpela long go pas long wok na laip bilong em.

Em i askim tu ol pasto long wan wan kongrigesen na ol manmeri long sapot bilong ol.

Em i tok tenkyu long ol pasto na ol sios lida long ilektim em olsem presiden bilong distrik.

Em i tok bikpela wok em long bringim bek ol pipel long sios na bilip long Bikpela.

Bisop Mottoro husat i bin wok olsem ekting presiden bilong ELC Jiwaka distrik long las wanpela na hap yia i strongim tingting bilong Bisop Koane na i tok ol bai sapotim em long wok bilong em.

Long wankain, taim ELC PNG i bin makim foapela nupela nesenel kodineta.

Ol nupela kodineta em Tony Kudang olsem Yut Kodineta, Bonny Keoka i go het long wok olsem Luteran Divelopmen Seketeri, Reveren Hans Giergere olsem Evanjelisim Kodineta, Daniel Suan olsem Edukesen Kodineta.

Bai ol i makim Wokman Trening kodineta long dispel mun, Jun. Reveren Wesley Kerenga i kodineta bilong dispela opis nau.

Ol i bihainim straksa bilong sios na ol lo i lukautim dispela ol opis.