JIWAKA Sumatin na Greduet Asosiesen (JSAGA) i laik helpim ol yangpela long kisim gutpela save na kamap gutpela Kristen manmeri long kirapim provins na kantri.

Presiden Jonah Anton wantaim ol ekseketiv i mekim dispela tok taim ol i givim 8-pela bokis teks buk i go long skul long stat bilong mun Jun.

"Yumi i stap long wanpela taim we em i hat long mekim ol samting,” Anton i tok.

“Korapsen i kamap bikpela, planti ol sumatin husat i greduet i no painim wok na laip i no isi.

"Yupela ol yangpela sumatin mas skul strong na putim God i go pas.

"No ken kamap wankain olsem ol narapela long ol bikhet pasin.

"Yupela mas kamap narakain na senisim provins bilong yumi.

"Provins bilong yumi i nidim humen risos long divelop gut.

"Dispela ol buk mipela i givim, yupela mas yusim gut na kisim gutpela save.”

Michael Otto Awoliye i surukim tok olsem "times are tough and people are rough" so ol sumatin mas skul strong na kisim gutpela mak long painim wok.

Deo Mondo i askim ol sumatin long ritim planti buk long kisim gutpela save.

 na wok gut long skul.

"Ol manmeri husat i rit i kamap gut long laip. Yupela mas rit moa." 

JSAGA ekseketiv i bin askim long kisim buk long Project Yumi Inc, wanpela seriti ogenaisesen long Australia we i save patna wantaim ol PNG komyuniti long strongim kwaliti bilong edukesen na helt kea.

Project Yumi i bin givim 46 bokis bilong ol buk we JSAGA i distribitim long ol 5-pela sekenderi skul long Jiwaka provins.

Prinsipel Betty Wena i salensim ol sumatin long ritim planti buk.

"Ol dispela JSAGA ekseketiv i kam, ol i no bin go long wanpela isi rot.

"Yupela no ken pilai pilai long stadi bilong yupela. Yupela mas wok strong long lukim yupela i winim driman bilong yupela.

"Pasin bilong ritim buk i mas kamap sistem bilong yupela. Sapos yu laik go moa long skul na kisim moa save, yupela wan wan i mas ritim planti buk."

Misis Wena i tok tenkyu long JSAGA na Project Yumi long wok bung wantaim tupela ogenaisesen we i lukim planti helpim i go long ol skul long Jiwaka.

Hoffman Gulgarye i raitim