BILIP manmeri i putim God i go pas olsem God bai blesim ol long ol narapela samting ol i nidim long laip, Pasto Morot  Haung bilong Malahang Ivanjelikal Luteran Sios (ELC), Lae Seket long Morobe i tok.

Em i tok olgeta samting i kam long God na God yet i holim laip.

Em i tok yu i no inap long mekim samting gut sapos yu no kisim samting i no tru.

Pasto Haung i mekim dispela tok long taim em i holim lotu long las wik.

Em i givim piksa bilong Great Gren Sif Sir Michael Somare olsem man husat i putim God i go pas inap long wok gut olsem lida bilong kantri.

“Sapos yu dokta, loya, tisa o kapenda yu mas putim God i go pas olsem wok bilong yu i ken kamap gut,” Pasto Haung i tok.

“I nogat wanpela samting i kamap gut long em yet.

“Olgeta samting i gat as bilong em.”

Pasto Haung i mekim dispela tok long taim em i serim tok bilong God long Gut nius bilong Jon 15: 1-2, “Mi yet i diwai wain tru. Na Papa bilong mi em i papa bilong gaden wain. Olgeta han bilong mi i no save karim kaikai, em Papa i save rausim. Na olgeta han i save karim kaikai, em Papa i save rausim ol lip samting bilong en i nogut, na mekim em i kamap klin, bai em i ken karim kaikai planti.”

Pasto Haung i tokim ol manmeri olsem sapos ol i fama o mekim wanem ol wok, ol i mas mekim wantaim tingting long presim nem bilong God.

Em i tok God i no tingting tumas long wanem ofa yu givim long em, tasol yu givim lewa na tingting bilong yu long em, dispela i bikpela samting.

Paulus Tali i raitim