BIKPELA i tok olsem, “Mi laik skulim yu gut, na soim yu long rot yu mas wokabaut long em. Bai mi skulim yu na lainim yu,” Buk Song 32:8

God i laik soim rot long yumi na stiaim yumi long ai bilong em.

Sapos yumi harim tok bilong em na bihainim, bai yumi i no inap abrus long gutpela rot.

God i gat narapela rot yet long stiaim yumi. Sampela taim em i mas yusim strongpela tok long stretim yumi. Long BukSong 32 em i tok, “Yu no ken kamap hos na donki. Tupela i no gat save. Yu mas putim ain i gat longpela baklain long maus bilong tupela, na pulim baklain long stiaim tupela. Sapos yu no mekim olsem, bai tupela i no inap bihainim laik bilong yu.”

Hos na donki i no save pilim gut taim man i pulim baklain i stap long maus bilong ol.

Ain i givim pen, na dispela i meim hos na donki i bihainim kwik tok bilong man i stiam em.

God i no laik stiaim yumi long dispela kain pasin na givim pen long yumi.

Tasol sampela taim yumi i no laik harim maus bilong God, bai God i mas yusim dispela kain rot.

Wanpela Sande wanpela Kristen i ting long go raun nating long kar bilong em.

Em i no go long lotu na em i bihainim laik bilong em yet tasol.

God i no laikim dispela pasin man i mekim, na em i larim wanpela hevi i kamap.

Kristen man i no kisim bikpela bagarap, tasol kar bilong em i bagarap tru.

Kwiktaim Kristen man i klia God i gat tok long em.

Em i tok sori long pasin em i bin mekim.

Bihain dispela man i stori long pasto long wanem samting i bin kamap long em.

Em i amamas long God i bin skulim em na i stretim em.

Pasto i bekim, “God i gat planti rot bilong stiaim man. Gutpela yu pikinini bilong God na olsem em i no putim ain i gat longpela baklain long maus bilong yu.

Sapos yu bin harim liklik nek bilong bel bilong yu na yu bihainim, nau kar bilong yu i no inap bagarap.”

God em i gutpela Papa tru. Em i no laik pikinini bilong em i go lus.

Long taim bilong ritim Baibel na prea, yumi i ken painim pes bilong God na kisim save long rot yumi mas bihainim.

Long lotu tu God i laik skulim yumi na lainim yumi long pasin bilong em.

Tasol sapos yumi no laik lukluk long em na yumi i no laik harim tok, em bai i bihainim narapela rot bilong stiaim yumi.

Em bai stretim yumi na dispela i givim pen long yumi.

Long bikpela marimari bilong em, God bai mekim samting olsem em i tok long pas i go long Hibru 12:8, “God i save stretim olgeta pikinini bilong em. Sapos em i no stretim yupela, orait nau yupela i save yupela i pikinini tru blong em. Nogat. Yupela i olsem pikinini bilong rot tasol.”