POP Francis i askim ol Katolik bilip manmeri long holim strong lotu bilong Korpus Kristi (bodi na blut bilong Jisas).

Em i mekim dispela tok long taim sios i holim Korpus Kristi Pestode lotu long Santu Peter Basilika long las Sande.

Em i tok sios i bilip na i bihainim tok bilong Jisas taim em i tok long Gutnius bilong Matyu 26: 26-30, Mak 14: 22-26, Luk 22: 14-20.

Dispela tok i stap tu long Jon 6: 35.

“Yukaris i save strongim ol husat i hangre long spirit,” Pop Francis i tok.

“Ol bai i no inap hangre taim ol kisim Jisas long dispela Sakramen.”

Pop Francis i tok ol manmeri i no ken oltaim tingting long givim kaikai long bodi tasol i mas tingim spirit tu.

Bihainim dispela kastom bilong lotu, Pop Francis i askim olgeta Kristen long bringim Jisas i go long ol arapela husat i no strong yet na husat i no harim yet Jisas.

Em i tok ol manmeri husat i hangre long bodi bilong Jisas i save kisim bel isi taim ol i kisim em long Sakramen bilong Yukaris.

Katolik sios i save mekim prosesio na karim bodi bilong Jisas long kalis long wanpela stesin na i go long narapela na mekim ol prea na lotu.