OL KATOLIK pater i mas wok long strongim ol bilip manmeri long ol i no ken lusim sios i go aut.

Pater Gregory Bicomong, SDB, Provinsal Superia bilong ol Salesian (Don Bosco) PNGSI vais provins i bin mekim dispela tok long Pot Mosbi long pinis bilong mun Me.

Em i bin givim ritrit long ol pater bilong Mosbi Asdaiosis long Emmaus Ritrit Senta long Is Boroko.

Em i tok ol pater i olsem Moses we ol i harim singaut bilong Bikpela na i bihainim singaut bilong em.

Em i tok Bikpela i tokim Moses olsem graun Moses i sanap antap long em i holi na olsem graun ol pater krungutim i holi.

Ol i lusim ol samting bilong graun bai ol i redi na stap holi olsem God i ken yusim ol long karimaut wok bilong em.

“Ol pipel nau i laikim ol pater husat i bilip tru, na i givim ol yet i go long God Papa na i larim God i karimaut wok bilong em long laip bilong ol,” Pater Gregory i tok.

“Blesing yupela i kisim na wok yupela i mekim i bikpela samting.

“Yupela i mas strongim bilip bilong ol manmeri na bringim ol i go long God Papa.”                  

Pater Gregory i tok arere long ol salens sios i wok long bungim long dispela taim em long ol Katolik bilip manmeri i lusim sios.

Ol arapela salens em wan wan Katolik famili no serim bilip bilong ol wantaim ol arapela Katolik famili, ol Katolik bilip manmeri i no save long Baibel na ol Katolik bilip manmeri i no save serim Katolik bilip bilong ol wantaim narapela narapela.

“Yupela i mas skulim gut ol manmeri olsem ol i gat bilip long God,  go lotu na kisim Bodi bilong Jisas Krais long lotu,” Pater Gregory i tok.

Namel long ol lain husat i stap long dispela ritrit em Kardinal Sir John Ribat, Asbisop bilong Pot Mosbi Asdaiosis.

Isabella Saleau i raitim