OL meri long Papua Niugini i mekim bikpela wok long bringim bel isi, na ol wok bilong kamapim gut sindaun bilong komyuniti.

Namba tu seketeri jeneral bilong Yunaitet Nesens (UN), Amina Mohammed, i mekim dispela toktok bihain long em i bin kam lukluk raun long PNG long tim bilong Peace Building Commission.

Dispela tim i bin lukluk long wok bilong ol meri, ol rot bilong kamapim bel isi na divelopmen bilong kantri.

Em i tok as bilong dispela raun bilong ol em long makim Intenesenel Wimens De na opim program bilong UN na Yuropian Yunion (EU) long stopim vailens egensim ol meri na long toktok long sampela bikpela salens bilong ikwaliti, sekyuriti, sastenebal divelopmen na klaimet senis.

Em i tok bihain long dispela raun bilong em long PNG, olgeta samting long wol i senis long taim COVID-19 i kamap.

Em i tokim UN long mekim wok bilong helpim PNG na ol arapela liklik kantri bikos kain kain hevi i ken bagarapim ol gutpela wok i bin kamap bipo.

Em i bin go raun long Bogenvil we em i bungim ol strongpela lida meri na em i amamas long ol i wok wantaim ol man long kamapim bel isi long komyuniti.

Em i tok tu olsem gutpela sindaun bai kamap sapos ol meri na gels i no pret long wokabaut na mekim wokim wok bilong ol. Pasin bilong jenda beis vailens (GBV) em wanpela hevi PNG i mas daunim long kamapim gutpela sindaun bilong kantri.

Long taim ol i go raun long Hailans, em i bin bungim ol meri husat i bin kisim taim long GBV na em i harim stori bilong ol.  Ol famili i no pas strong olsem bipo na pasin bilong dring spak i wok long kamapim hevi long komyuniti.