OL YANGPELA Luteran Sios long Long Ailan long Madang Provins i bin amamas long kamap long namba wan yut bung long eria bilong ol long stat bilong las mun.

Dispela bung i bilong mekim Luteran sios i save long hamas namba ol yangpela bilong ol i stap long ailan.

Long wankain taim, sios i kamapim dispela bung long strongim bilip bilong ol yangpela.

Bung i bin kamap long Buda Luteran kongrigesen na i wanpela long ol stesin long Long Ailan. Inap long 12 kongrigesen bilong Luteran sios long Raikos distrik long Madang i bin kamap long bung.

Pasto Joe Ande bilong Lae kongrigesen i bin go pas long dispela bung.

“Sios i kamapim dispela bung long luksave long yupela ol yangpela na long strongim bilip bilong yupela,” em i tok.

“Sios i laik strongim bilip bilong yupela tu.

“Sios em yupela na yupela i lida bilong tumora.”

Helpim Pasto Joe em Pasto Kumbo Taufio na Pasto Stanley Mark bilong Madang.

Tupela pasto i amamas long ol yangpela na i tok sori olsem sampela taim bikos long salens bilong lojistik olsem long fainens na trenspot wantaim longwe bilong ples na i save mekim long ol i raun na lukim ol.

Yut lida bilong Buda kongrigesen Steven Douglas i tok tenkyu long ol pasto na i tok maski ol salens i stap, ol wok hat long traim strongim tingting na bilip bilong ol yangpela.

Em i tok tenkyu long ol Pasto Joes, Kumbo na Stanley long kamap na strongim bilip bilong ol yangpela.

Bikpela ektiviti ol pasto i bin givim ol yangpela em long lainim wan wan hap bilong baibel we i strongim tingting bilong ol.

“Yupela i mas luksave long strong bilong God long laip bilong yupela,” Pasto Stanley i tok.

“Long Jisas Krais tasol yu ken go long God Papa. I no gat narapela rot.”

Em i givim ol tok long rit bilong 1 Korin 1: 18 na i askim ol yangpela long putim laip bilong ol long han bilong Bikpela olsem Bikpela i soim ol long rot bilong stap.

Paulus Tali i raitim