LONG yia 2018 mi bin kamap long St. Mary’s Peris long Goroka. Taim mi nupela yet, mi lukim wanpela lapun meri tru i kam long haus lotu olgeta Sarere, long klinim plaua gaden klostu long groto bilong Santu Maria.

Bihain long brumim na ples i kamap klin, em i putim plaua long stetu bilong Santu Maria na pre. Bihain long pre, em i wokabaut i go bek wantaim liklik ain stik bilong en. Mi save sori long em bikos em i lapun tru. Baksait bilong em i krungut.

Em i bin wokim dispela wok olgeta Sarere. Bihain long sampela taim em i no kamap moa long ol Sarere long klinim plaua olsem em i save mekim. Wan wan taim taim em i kam na mekim wok. Namel long yia 2019, mi no lukim em i kam planti taim moa. Mi save olsem em i lapun tumas.

Long namel bilong mun Januari 2020, sampela lain i kam toksave long mi olsem Mama Rosa i laik go bek long Simbu. Em i askim mi go lukim em na givim em Sakramen bilong Unsio.

Mi go long haus bilong em stret. Tasol neighbor i tokim mi olsem klostu tupela mun nau, em i no stap long haus bilong em. Wanpela tisa i pilim sori long em na kisim em i go na stap wantaim ol long haus bilong em. Dispela tisa i no wan lotu olsem Mama Rosa, na em i no bilong Simbu. Nogat. Em i bilong Jiwaka.

Taim mi kamap long haus bilong tisa em i wetim mi i stap. Mi askim em, “Mi harim olsem yu bai go tumoro long Simbu, ah?” Em i bekim na tok, “Sori  bubu Pater! Mi laik go bek long ples na wetim dai. Mi no laik dai long hia. Nogut mi givim hevi long narapela.”

Mipela pre, na mi welim em wantaim oil bilong sikmanmeri na givim komunio long em tu. Bihain long prea, em i tok; “Em nau! Mi redi pinis. God yu ken kisim laip bilong mi nau.”

Tripela wik bihain, em i kam bihainim misa long Faniufa taim mi wokim misa long hap. Bihain long Misa mi askim em, “Yu tokim mi bai yu go long ples, tasol nau yu stap yet ah? Mi draivim em na lusim em long Mambu maket, mi hariap i go long St. Mary’s bilong wokim namba tu misa.

Tupela de bihain long Ista, em i kam long St. Mary’s. Sori long em. Lapun tru pinis tasol painim rot bilong em i wokabaut kam long St. Mary’s. Mi lukim em na tok: “Bilong wanem yu lapun olsem na raun yet? Em i tok; “Mi laik kisim Jisas long Santu Komunio.” Mi tokim em gen: “Bilong wanem yu no toksave long sampela lain, bai mi kam long haus na bringim Jisas long yu.” “Nogat!” Em i tok. “Mi laik kisim Jisas insait long haus lotu.”

Sampela lain i holim han bilong em na go pas long em i go antap long lata i go long haus lotu. Mipela pre na givim Santu Komunio long em. Taim em i pre i stap, mi tokim em: “Sapos yu pre pinis, singautim mipela long helpim yu long wokabaut go daun long lata.

Mipela sanap ausait long haus lotu wetim singaut bilong em. I nogat wanpela singaut i kamap, na mipela i kirap nogut tru, em i wokabaut i kamap klostu long mipela pinis. Mi askim em: “Yu kam daun long lata olsem wanem?” Em i tok, “Jisas i holim han bilong mi na kamdaun long lata.”  Bihain wantaim sampela lain mi draivim em i go bek long Mambu maket.

Long de 20 Me 2020 moning sampela sios lida bilong Faniyufa i kamap long opis bilong mi na toksave olsem, Mama Rosa i dai pinis long aste nait long 8 klok. Em i wanpela tarangu meri, ol i no laik holim em longpela taim. Em i nogat famili tu. Olsem na ol i askim mi go long Mambu, blesim bodi bilong em.  Em i taim bilong SoE yet, tambu long ol bung.

Long narapela de long 11 klok moning, mi go daun long Mambu. Mi holim wanpela misa bilong ol dai man na blesim bodi bilong em. Long 2 klok apinun, ol i planim em long pablik matmat long Kama. Em i Mama Rosa. Em i gat wanpela pikinini man. Man i marit tasol i nogat pikinini. Em i mak olsem taim pikinini man bilong em i dai, bai i nogat moa pkinini i holim nem bilong famili i stap. Sori long dispela tarangu meri!