WANPELA pasto i singaut long ol manmeri long sapotim ol sios long skruim tok bilong God.

Wanpela Seven De Edventis (SDA) sios Pasto, Julius Divu i mekim dispela tok long wanpela
bung long Sohano ples, Buka long Atonomus Rijon bilong Bogenvil long las wik.
Em i tok God i givim lo long manmeri long ol i mas givim luksave long em na wanpela lo em
sapotim ol wok manmeri bilong em.
Em i tok dispela lo i stap long taim bilong Moses long baibel i kam inap nau.
“Long God laip i stat na long God yet laip bai pinis,” Pasto Julius i tok.
“I no gat wanpela samting i kamap nating, em i mekim olgeta samting.
“Manmeri i gat wok long givim luksave long strong bilong God and givim ona long em.”
Pasto Julius i tok arere long manmeri i givim luksave long ol wok manmeri bilong Bikpela i ken
sapotim ol tarangu tu.
Em i tok dispela tok tu i stap long Baibel.
Em i askim ol manmeri, moa long ol lain husat i wok mani long ol i mas bihainim komanmen
bilong givim wanpela ten bilong ol samting long namba wan kaikai bilong wok bilong ol i go
long Bikpela.
“Wok o bisnis em yupela i mekim i na kamap nating,” Pasto Julius i tok.
“Bipo long mama i karim yu, God Bikpela i makim wok yu bai mekim.
“Yu no ken tok yu kisim dispela wok o kamap olsem kain manmeri long strong bilong yu yet.
“Olgeta samting God i makim pinis bipo long ol i kamap.”
Pasto Julius i givim tok lukaut olsem wanpela samting we bai paulim tingting bilong ol em,
Satan, man nogut.
Em i tok ol i mas was long ol dispela man bilong kusai, giaman na i laik pulim ol manmeri i go
wantaim em long ples nogut.
“Ol wok manmeri bilong God i helpim yupela na yupela i mas helpim ol tu.
“Presen God i givim long yumi i bikpela moa long amamas yumi kisim long God.”

Alex Munme i raitim