POP Francis i pre long wol i mas kisim bel isi.

Em i tok man nogut i paulim tingting bilong ol manmeri na olsem i no gat moa rispek i stap
long laip bilong man.
Em i mekim dispela tok long Sande Misa long St Peters Basilica, Vatikan Siti long Rom long
16 Me.
Em i mekim dispela tok tu long taim kain kain pait we laip bilong ol manmeri i lus, moa long
taim Israel na Palestain i wok long pait long Midel Is.
Nau yet tupela kantri i tok long kamapim bel isi olsem bai i nogat moa pait namel long tupela
yet.
Em i tingim ol Katolik bilip manmeri long Myanmar (pastaim Burma) husat i bungim hevi
aninit long gavman bilong ol.
“God bai tanim bel bilong ol manmeri i kisim bel isi na moa long dispela, Jisas i wok long
askim Papa bilong em long rausim kain traim i kamap long mipela,” Pop Francis i tok.
Pop Francis i mekim dispela tok tu long tingim taim we pastaim long ol i holim pasim na
kotim em, Jisas i bin pre long Gaden bilong Gethsemane long Papa God i strongim em long
bungim pen na dai bilong em.
Jisas i bin pre tu long God Papa long em i givim strong long ol disaipel bilong em long kisim
strong na skruim tok bilong em.
Long hia, Pop Francis i tok long tripela salens em long holim strong yet bilip bilong mipela,
long strongim yuniti na long holim tok tru.
Long bilip, Pop Francis i tok mipela i nidim bilip long abrusim ol salens na hevi we mipela i
bilip mipela bai bungim.
Em i askim wan wan famili long strongim pasin yuniti, olsem gutpela famili yunit i kamapim
gutpela sosaiti na komyuniti.
Em i tok long yu tok tru, dispela i no min olsem banisim tasol ol tingting na bilip yu tasol i
mas pas wantaim Jisas Krais.