Oloman, Papa i bin laikim yumi na givim bel bilong em mao yet long yumi! Em i kolim yumi ol pikinini
bilong God. Na tru tumas, yumi stap pikinini bilong God.

1 Jon 3:16
Sapos tude Praim Misnista i kam na tokim yu, “Yu gutpela wokboi o gel. Mi save laikim yu. Yu ken stap
pikinini bilong mi.” Ating bai yu amamas a? Yu tingim liklik. Nau yu stap pikinini bilong Praim Minista. Yu
ken stap long gutpela haus bilong en. Yu ken kaikai wankain kaikai olsem em i save kaikai. Yu ken raun
wantaim em. Taim yu sot long mani, bai yu go askim em. Bai yu no mas sem. Nogat, yu pikinini bilong
em na em inap helpim yu.
Bai yu no inap lusim tingting long dispela gutpela de Praim Minista i bin kisim yu na yu bin kamap pikinini
stret bilong bilong em. Dispela de i bikpela de long laip bilong yu.
Tasol harim. Papa God i winim tru ol papa bilong dispela graun. Em tu i winim olgeta King na olgeta
Praim Minista. Na dispela gutpela Papa i tok long yu ken kamap pikinini bilong em. Ating yu laik givim
baksait long dispela gutpela tok bilong em ah? Yu laik sakim tok bilong em na yu no laik bihainim?
Praim minista inap helpim yu long laip bilong dispela graun tasol. Dispela laip i sotpela. Taim yu dai bai
em ino inap helpim yu moa. Nogat. Buk Baibel i tok long 1 Timoti 6:7,”Yumi save taim mama i karim
yumi na yumi kamap long graun, yumi no bin karim wanpela samting i kam. Na taim yumi lusim graun
yumi bai ino inap karim wanpela samting igo.”
Papa God i winim Praim Minista bilong mipela. Em bai inap helpim yumi long nau na long bihain taim tu.
Em i stap gutpela papa bilong oltaim oltaim. Olsem na yu kam long em na yu ken amamas. Emi no inap
long raunsim yu. Nau em i laik helpim yu na mekim gut long yu. Na bihain bai yu ken igo stap long
gutpela ples bilong em na bai yu stap gut oltaim oltaim.

Jerry Tupex Kolum