GAVANA bilong Hela Provins, Philip Undialu i soim sapot long wokpainim long tokaut olsem Papua Niugini em i Kristen kantri.

Em i mekim dispela tok taim em i kisim Siaman bilong Konstitusenel na Lo Rifom Komisin (CLRC) Kevin Isifu na ol tim bilong en husat i go long Hela long Mande.

Kevin Isifu na tim bilong en i bung na toktok wantaim ol pipel long Hela long Mande, Tunde na asde Trinde long kisim tingting bilong ol long tokaut long PNG olsem Kristen kantri.

“Provinsal gavman, PEC, na ol memba bilong provinsal asembli, mipela i sapotim dispela senis long kamap,” Gavana bilong Hela Undialu i tok.

  Mista Isifu i tok tenkyu long Gavana Undialu bikos em i wanpela memba bilong Palamen tasol husat i stap long provins long kisim ol CLRC tim i go insait. Ol arapela memba bilong Palamen long ol arapela provins CLRC tim i go raun ol i no bin mekim wankain.

Gavana Undialu i tok dispela senis o rifom em i kamap long raitpela taim we PNG i mas lainim long ol ekpiriens bilong ol arapela kantri husat i nau bungim ol hevi bilong kainkain lotu o rilijen na pait, god giaman na ol arapela kainkain prektis we i wok long kamap bikos long fridom bilong kain kain rilijen.

“Mipela nid long lukautim na luksave gut long wanem em  Kristen na fridom bilong rilijen. Long gutpela bilong kantri bilong yumi, yumi mas luksave gut long dispela,”Gavana Undialu i tok.

Em i tok seksen 45 bilong Mama Lo i tokaut long fridom bilong rilijen tasol em i no toktok moa long dispela sait olsem na gavman i mas mekim klia dispela fridom em i toktok long en.

“Em i no nupela samting tasol mipela i no mekim klia wanem em ol gutpela samting bilong Kristen na em i minim wanem long pasin bilong Papua Niugini,” em i tok.

Em i amamas long Praim Minista James Marape na Siaman bilong CLRC long kamapim dispela samting.