SIASSI Ivanjelikal Luteran Sios (ELC) PNG long Morobe Provins i gat nupela bisop. Dispela em Reveren Chris Akwa.

Em i kisim ples bilong Reveren Micah Yalamu.

Moa long 1500 manmeri i bin kamap long Lablab stesin long lukim Deputi Het Bisop blong ELC PNG, Reveren Lucas Kedabing i blesim Reveren Chris na putim em long dispela sia.ol pipel bilong Molap na Mutu i bin go pas long lotu.

Gavana bilong Morobe Ginson Soanu, lokal Memba bilong Palamen, Dokta Kobby Bomoreo, ol distrik lokal level gavman presiden na wod kaunsila long distrik i bin kamap long witnesim dispela instolesen.

Reveren Kedabing i salensim Reveren Micah olsem bikos long kain ples Micah bai stap na wok long em, wok bai i no inap long isi.

Em i tok planti taim bisop bai ran long solwara, go antap long ol maunten na wokabaut long longwe rot na nogat rot bilong kar long ran, dispela bai mekim wok bilong em i salensing long bringim Gutnius na long kisim ol manmeri i go long God.

Em i tok taim i i senis we planti manmeri i lusim bilip na i givim baksait long Bikpela tasol i tok dispela i wok bilong sios long strongim bilip bilong ol manmeri long go bek long God.

“God Papa i gat salvesen plen long bringim ol manmeri i go long kindom bilong em,” Reveren Kedabing i tok.

“Bikpela Jisas Krias i bin kam, karim pen, dai na winim dai long kisim bek yumi i go bek long Papa.

“God i mekim olsem long yumi winim ol traim bilong graun na man nogut olsem yumi ken serim dispela amamas bilong em.”

Reveren Kedabing i tok tenkyu long Presiden Micah long gupela wok bilong em na i trongim tingting bilong em long go het long wok bilong em long wanem hap sios i makim em.

Em i askim ol manmeri long Siassi long sanap strong long ol gutpela skul na bilip em Reveren Micah i skulim ol.

Em i askim tu ol pipel long strongim Bisop Akwa long nupela wok bilong em.

Gavana Saonu i amamas long makim bilong nupela bisop na i tok sios na gavman i save wok wantaim long brigim sevis i go long ol pipel.

Em i tok gavman bilong em i redi logn wok wantiam sios na i tok em bai skruim yet dispela spirit bilong wok bung wantaim ol.

Paulus Tali i raitim