LONG wanpela bikpela lotu long las wik long Araimiri Sekenderi Skul, Galp Provins, wanpela Salesian brude i strongim ol tok promis bilong em long stap relijus.

Dispela brude em Conrad Vamilat, SDB, husat i strongim ol tok promis bilong “Obedience (Harim tok), “Poverty” (long no ken gat samting bilong em yet) na “Chastity” (no ken marit) long ai bilong superia, ol brata pater na brude, ol sista na ol tisa na sumatin bilong Araimiri Sekenderi Skul haus lotu.

Em i mekim promis na tokaut long bihainim dispela ol tok promis tu long pestode bilong Santu Dominic Savio.

Pater Pankaj Xalxo, het tisa bilong Araimiri Sekenderi Skul i bin go pas long lotu.

Pater Jospeh Tinh na Pater Gregory Bicomong i helpim Pater Pankaj long dispela lotu.

Pater Pankaj i tok stap relijus i no isi laip long wanem, yu mas oltaim bungim ol salens  long sait bilong bodi na spirit wantaim.

Em i tok wanpela samting i strongim ol relijus long stap em long bilip ol i gat long Bikpela Jisas Krais.

Em i tok long Jisas yet, yu inap long winim ol traim na sanap strong.

Em i askim Brude Conrad long oltaim i mas pas wantaim Jisas na askim Holi Spirit long soim em rot bilong stap.

Pater Pankaj i askim tu long ol sumatin long luksave long singaut bilong God long laip bilong ol, sapos dispela em i singaut bilong kamap tisa, nes, dokta, kapenta o relijus.

Em i tok dispela wan wan ol wok i wok Bikpela i givim long soim laik bilong em na long kamapim kingdom bilong em.

Em i tok Santu Dominic i piksa bilong dispela singaut em Bikpela i mekim long em na ol tu inap long luksave long singaut long laip bilong ol.

Brude Conrad i tok tenkyu long ol wan brata bilong em na olgeta lain husat i sapotim em.

Em i tok tenkyu long God na i tok long God yet em i stap strong.

Em i tok em i no save long hap em bai stap na wok tasol i tok olgeta samting i stap long han bilong God.

Willie Kessi Jnr bilong Araimiri Sekenderi Skul i raitim