PATER Siby Mathew Peedikayil, HGN i nupela bisop bilong Aitape Daiosis long Wes Sepik.

Em i gat 49 krismas na i bilong kantri India.

Em i kamap pater long 1994 na i wok tasol long India inap long 1997.

Em i kam long Papua Niugini long 1997 na i stap spiritual dairekta bilong ol sumatin husat i laik kamap pater long Don Bosco Seminari long Vanimo, Wes Sepik.

Em i wok olsem inap long 2004 we ol i makim em long wok olsem Vika Jeneral bilong Daiosis na i wok aninit pastaim long Emirutus Bisop Cesare Bonvento na nau aninit long Bisop Francis Meli (Daiosisen).

Long 2008 sosaiti bilong em i salim em i go bek long India we i stap na wok olsem Rector o het tisa bilong St Joseph Seminari long Khamman provins.

Long 2014 sosaiti bilong em i makim em long wok olsem Provinsial Superia.

Bihain long dispela sosaiti bilong em i salim em i kam bek long Papua Niugini we em wok olsem spiritual dairekta bilong Maina na Mesa Seminari long Vanimo, Wes Sepik provins.

Em i mekim dispela wok inap long 2018 em i wok olsem Vika Jeneral bilong Vanimo Daiosis, Wes Sepik Provins.

Las wik Fonde Pop Francis i makim em olsem Bisop bilong Aitape.

Em i no klia wanem taim em bai kisim nupela sia bilong em tasol i gat bilip olsem em bai kisim dispela sia long liklik taim.

Aitape i bin i no gat bisop long sampela yia bihain long taim Pop Francis i bin makim Bisop Otto Separy long kamap bisop bilong Bereina long Sentral Provins.