PRAIM Minista James Marape i holim wanpela bung wantaim Nesenel Sekyuriti Kaunsil long toktok long ol hevi bilong sekyuriti na lo na oda long kantri long dispela taim.

Namel long ol toktok ol i toktok tu long wok operesen bilong COVID-19 na ol wok redi bilong 2022 Nesenel Jeneral Ileksen.

Olsem siaman bilong Nesenel Sekyuriti Kaunsil, Mista Marape i tok kaunsil i luksave long COVID-19 na ol salens i kam wantaim em na ol rispon bilong gavman long olgeta level na em i mekim disisen olsem rispon wok long COVID-19 i mas go het.

Kaunsil i toktok tu long ol lo na oda hevi we i wok long kamap bikpela long kantri long dispela taim na i bagarapim sindaun bilong ol pipel na bisnis. Wok bilong sekyuriti i mas stap long fran taim gavman i wok long redi long go insait long nesenel jeneral ileksen long neks yia.

Mista Marape i tok ol kriminel ektiviti na lo na oda hevi we i kamap em risal bilong nogat kepesiti na pawa, nogat politikel lidasip long olgeta level na gavanens sistem i no wok.

Em i luksave long hevi i kamap long Koki, Pot Mosbi las wik we tupela man i ranim na kilim wanpela man i dai na ol arapela hevi namel long ol etnik grup. Em i luksave tu long pasin spak na pait na ol yangpela i smuk drag na planti arapela hevi long Is Nu Briten, Enga, Hela, Isten Hailans na Milne Be na tok em ol ki sekyuriti salens we i bagarapim gutpela sindaun bilong ol pipel na bisnis.

Ol koporet na bisnis haus i wari olsem ol lo na oda hevi i bagarapim bisnis. Ol lo enfosmen ejensi i stap long adresim pablik seifi isu na sekyuriti bilong gavman na praivet sekta,” Praim Minista i tok.

Em i tok moa olsem Kaunsil i givim daireksen pinis long disiplinari fos na intelijens komyuniti long kisim wanpela rot na adresim ol kriminel ektiviti we i wok long kamap nau.

Gavman i yusim ol sistem we i stap pinis; em ol komyuniti polis, komyuniti midiesen, salim ol mobail skwad i go na tu salim ol PNG Difens Fos Kol-Aut long daunim hevi.

Em i tok long abrusim COVID-19 gavman i yusim ol ol polisi we i stap long Nesenel Pandemik Ekt na ol bihainim gaidlain bilong ‘Nupela Pasin’ long strongim ol mesa bilong banisim COVID-19 long ol wok ples, edukesen institusen na ol komyuniti. Na tu e mi wok long kamapim wanpela Ikomonik Stimulus Pekij bilong kirapim bek ikonomi.

  Mista Marape i tok, maski ol dispela rispon i stap tasol olgeta sekyuriti protokol i no tingim ol hevi we i ken kamap long 2022 Nesenel Jeneral Ileksen.

“Olsem na Nesenel Sekyuriti Kaunsil i agri long kisim apruval bilong kebinet long dairektim Nesenel Sekyuriti Edvaisori Komiti long kodinetim, plenim na lidim ol sekyuriti operesen bilong 2022 Nesenel Jeneral Ileksen.