Dirima peris long Gumine Distrik, Simbu i givim aut 1,300 pes mask long ol Katolik manmeri husat i bin go lotu long Sande tupela wik i go pinis.

Peris pris Pater Pita Kim (SVD) i bin kamapim tingting bilong samapim pes mask na wantaim sapot bilong peris pastrol kaunsil na ol voluntia mama long ples ol i bin samapim ol pes masks.

Dispela pes mask em bilong ol Katolik perisona tasol. Dirima-Yani komyuniti i gat populesen olsem 9,000 manmeri na ol nidim wankain sapot long ol lida bilong ol wan wan sios, na ol wod kaunsil.

Pasin bilong karamapim pes wantaim mask em wanpela wei bilong banisim manmeri long dispela sik COVID-19.

Pater Pita Kim wantaim siaman bilong peris kaunsil Pita Maima i tok tenkyu long ol sikispela mama husat i voluntia long samapim ol pes masks inap long tupela wikolgeta. Dispela wok i bin kamap long taim namba bilong COVID-19 i wok long kamap bikpela long kantri. Simbu i rekodim 113 manmeri husat i bin sik wantaim COVID-19 insait long tupela wik i go pinis.

Man husat i raitim dispela stori, Ennio Kuble i bin kirapim tingting long ol lida insait long Dirima-Yani i mas kamapim eksen long banisim ol pipel bilong ol long dispela sik COVID-19 long wanem i nogat gavman rispons i kam long komyuniti.

I gat tingting nau olsem ol lida i mas tingting long banisim olgeta 9,000 manmeri wantaim pes masks. Na tu ol i mas go pas long lainim nupela pasin bilong abrusim COVID-19; em long stopim pasin bung na wasim han wantaim sop na klin wara.

“Long Dirima-Yani i gat sevenpela elementari skul, tupela praimeri skul, na wanpela teknikel sekendari skul bilong ol meri i stap na ol komyunti i mas banisim ol tu long sik COVID-19.”

Ennio Kuble i raitim