ASKIM i go long bilip manmeri long pre long helpim ol wok manmeri bilong Bikpela.

Hugo T, wanpela seminarien husat i no raitim olgeta nem bilong em tasol i bin rait na salim ol tingting bilong em long sosel midia i tok ol relijus (pater, brude na sista) i wankain olsem olgeta arapela manmeri bilong graun.

Wanpela samting i mekim ol i narapela em olsem ol i mekim wok bilong Bikpela.

Ol i mekim promis long ol i mas harim tok bilong superia o bisop bilong ol, ol i no ken gat samting bilong ol yet na ol i no ken marit.

Dispela long lukim olsem ol i givim olgeta tingting na strong bilong ol long mekim wok bilong Bikpela tasol.

Hugo i tok bikos ol i man na meri na i wankain olsem ol arapela lain, ol inap pundaun long ol traim bilong graun.

Em i tok wantaim bilip long Bikpela na grasia bilong em, ol inap daunim ol traim na sanap strong long singaut bilong ol.

Em i tok em i bikpela sori long lukim sampela manmeri i save sutim pinga na lukdaun long ol relijus taim ol i pundaun long sampela traim.

Em i tok stap relijus i no isipela laip taim yu lukluk long laip bilong graun.

Em i tok planti manmeri i laikim laip bilong graun olsem long yu i mas gat mani, haus, kar, famili na olgeta arapela samting dispela graun inap long givim.

“Sampela lain i save ting, ol lain manmeri husat i kamap relijus em ol longlong, ol i no save wanem samting i gutpela,” Hugo i tok.

“Sampela i ting, ol i strongpela manmeri tru na olsem ol i mas stap stret olgeta taim, tasol i save lusim bilip na hop taim ol i lukim ol relijus i pundaun long traim.

“Ol relijus em ol man na meri olsem yu na ol i gat blut i ran long bodi olsem yu. Ol i no robot.

“Kamap pater, brude na sista i no wanpela kain mekimsave dispela ol lain manmeri i stap insait long em. Nogat.

“Ol i stap long laip em singaut ol i kisim long laip.”

Hugo i tok, ol i olsem Abraham we Bikpela i askim ol long lusim olgeta samting bilong as ples (long laip) na bihainim singaut bilong Bikpela (Buk bilong Stat 12:1-5).