WOK bilong ELC-PNG Sinod i bin stop liklik long taim Presiden bilong Papua Distrik Reveren Pasto Gundu Kagl i dai long Febueri 23 tasol komiti i tok wok bai kamap.

Siaman bilong Sinod komiti Sumasy Singin i tok ples bilong bung bai kamap long Sir John Guise Stedium  na deit bilong bung em bai stat long 9 – 15 Janueri 2022.

Em i tok ol sampela wok olsem bena i kamap pinis olsem 5 mita longpela na 2 mita bikpela bilong em ol i putim i stap long Papua distrik Het opis long Pot Mosbi.

Het Tok bilong sinod em i stap long buk bilong Josua 24: 15 “Tasol mi wantaim famili bilong mi, mipela bai lotu long Bikpela tasol.

“Ol ples bilong slip em komiti i gat tripela tingting wanpela em long putim ol delegeit long ol klasrum, narapela em long Ges haus na namba tri tingting em long putim ol i slip long ol hotel,” Mista Singin i tok.

 Ol komiti i rait i go long kontrola na wet i stap long hamas delegeit bai ol inap kam long taim bilong Sinod. Long sampela kontribiusen komiti i wanbel long kisim famili grup ofa o wan wan manmeri i ken givim sapot bilong ol long helpim sinod long mak ol i bin putim pinis tasol nau yet nogat wanpela i givim yet.

Ol wan wan seket bilong distrik olsem Oro, Westen, Pot Mosbi siti na Not Is bai redim kontribiusen na putim long akaunt ol Sinod komiti i bin opim pinis.

Mista Singin i tok komiti opim akaunt bilong sinod pinis tasol i nogat mani long akaunt yet. Komiti i bilip wok bilong kamapim sinod bai i go het yet.

Joseph Dawai i raitim