ELC-PNG namba tu bikpela sios long Asia-Pasifik i lusim moa long 31 pesen bilong inkam revenu bilong em long olgeta taim long salens bilong COVID-19.

Ivengelikol Luteran sios bilong Papua Niugini (ELC-PNG) Het Bisop Rt. Rev. Dr. Jack Urame i mekim dispela toktok long wanpela bung long Pot Mosbi.

Bisop Dr. Urame i tok sios i wok long lusim moa long K4 milien long olgeta wok mani bilong em na dispela i mekim sios i painim hat long mekim wok bilong em insait long kantri.

“PNG em i ples i gat maunten, wara na bus i save mekim i hat long go long ol ples we ol pipel i stap long en bikos planti hap bilong kantri i nogat rot bilong kar o ples balus long go long en na salens i bikpela tru.

“Tasol yumi mas lukluk long Jisas na holim Baibel long narapela han na lotu buk long narapela han na pre strong long God i ken helpim yumi,” em i tok.

Namel  long dispela taim planti ol lida bilong sios i dai na ikonomik salens tu i go bikpela. Yumi lukim olsem bihain long 10 i go long 50 yia bai sios i kam bek gen long ful operesen.

“Sios i gat bikpela sot tu long ol lida bilong ranim sios na mi traim long trenim ol lida tasol i gat planti salens tu,” em  i tok.

Rev. Dr. Urame i tok sios i wok long bungim hevi bilong fainens na ol wokman na meri long tioloji salens na edministresen wantaim.

“Sios i bungim hevi  tasol yumi no ken pret long COVID-19 yumi mas pret long God wanpela tasol na pre long em i ken helpim yumi,” em i tok.

Joseph Dawai i raitim