KOMYUNIKESEN i bikpela samting long bringim Gutnius i go long manmeri, Seketeri bilong Komyunikesen Dipatmen bilong Katolik Bisop Konprens (CBC), Pater Ambrose Pereira i tok.

Em i tok i gat planti wei o rot bilong salim tok i go i kam na ol misineri i ken yusim autim tok bilong Bikpela.

Em i mekim dispela tok long wanpela komyunikesen semina em CBC Komyunikesen Seketeriet i bin holim long Mai peris long Kimbe Daiosis, Wes Nu Briten long las wik.

Em i mekim dispela tok tu long Asensio Sande na long tingim Wol Komyunikesen De.

Wol Komyunikesen De i bin kamap long Mande, dispela wik.

Planti ol lain husat i kamap em ol tisa long ol skul long Wes Nu Briten.

“Yupela i rot bilong komyunikesen, bilong salim tok na kisim tok,” Pater Ambrose i tok.

“Dispela tok i go tu long olgeta Kristen long wok ol i gat long mekim.

“Ol i gat wok long makim maus bilong ol lain husat i no gat sans bilong tokaut long hevi bilong ol, long lain husat i kisim bagarap na ol lain husat gavman i daunim ol i go daun.”

Ol arapela patisipen husat i kamap em Kimbe Daiosis Midia Kodineta Brendon Kaita, Daiosis Vika Jeneral Pater Gabriel Tovo na Pater Benjamin Agea, Pastoral Vika na Katolik Edukesen Seketeri John Silpaga.

Mista Tovo i amamas na i tok tenkyu long Katolik Komyunikesen Seketeriet long kisim taim na givim dispela semina.

Em i tok ol tisa i lain gut long ol rot bilong raitim ol nius na kisim poto na long kamapim ol niusleta na ol megesin.