Namba 5 Sande bilong Ista long Kalenda bilong Katolik Sios i stori long tok piksa bilong Jisas olsem diwai wain na manmeri i bilip long em olsem han bilong diwai wain (Jon 15: 1 – 8).

Bipo long mi bin givim skul toktok, mi bin statim wanpela stori long ol samting mi bin bungim long laip taim mi stap long Makor Seminari long Indonesia.

Wanpela wiken mi wantaim sampela pren bilong mi i bin holim wanpela ritrit long wanpela sekenderi skul long taun bilong mipela.

Bipo long givim toktok bilong ritrit, mi bin givim wanpela askim i go long ol sumatin long tokaut long husat man o meri em ol i lukim olsem rol model o piksa bilong laip bilong ol manmeri em ol i laik bihainim.

I gat kain kain bekim mi bin kisim. Planti bilong ol i kolim ol nem bilong muvi stap olsem Rainbow Warior, Tarzan na sampela i kolim ol muvi sta bilong ol Korea na Saina.

Sampela i kolim ol biknem manmeri olsem Nelson Mandela, Mikhail Gorbachev, Margaret Thatcher na planti arapela nem moa.

I gat wanpela tasol namel long ol i bin kolim nem bilong Mother Theresa bilong Kolkata.

Long dispela ol bekim, mi bin luksave olsem planti yangpela i save moa long laip stori bilong ol muvi sta o narapela biknem manmeri bilong ol arapela kantri. Ol i nogat save long laip stori bilong ol Santu bilong Katolik Sios.

Bikos sapos yumi save gut long laip stori bilong ol santu, bai yumi ken tok olsem, olgeta santu em ol i ken kamap rol model bilong ol Katolik manmeri.

Taim yumi kisim baptais, papamama i save makim nem bilong santu olsem em i nem bilong yumi.

Tasol planti bilong yumi i lusim tingting long pasin na spiritual laip bilong ol santu na yumi tingim tasol ol muvi sta o ol arapela manmeri bilong graun.

Sapos yumi lukim gut, namba wan rol model bilong yumi em Jisas yet. Olgeta wok na skul bilong em i gat pawa long senisim laip bilong yumi. Skul na toktok bilong em sapos yumi ritim na tingim gut, em i save givim na senisim laip bilong yumi. Tasol sampela taim yumi olsem han bilong diwai wain i lusim as bilong diwai na yumi kamap drai na i no inap mekim ol gutpela pasin o kamapim ol gutpela wok long laip bilong yumi.

Olsem han bilong diwai wain, sapos em i no karim kaikai, papa bilong gaden wain i save katim na tromoi long san, i kamap drai na bihain ol i kukim long paia. Wankain tu long yumi sapos yumi yusim pawa bilong yumi yet long mekim wok na lusim tingting long stap wantaim Jisas, yumi bai kamap drai olsem han bilong diwai wain i lusim diwai stret.

Taim bilong Ista i stap yet. Sampela bilong yumi i bin lusim tingting na i no yusim grasia bilong Ista long mekim wok na helpim yumi kamap wan wantaim Krais, husat i kirap bek long dai.

Nau em i taim bilong nupela laip, olsem nupela kru i kamap long diwai wain bihain long papa bilong gaden wain i prunim pinis.

Nupela kru em i save kamapim nupela lip, na em i save karim planti prut moa moa yet.

Yumi tu i mas kamap olsem nupela kru bilong diwai wain na karim planti grasia bilong God i go na serim wantaim ol narapela.

Planti bilong yumi i kolim yumi yet olsem manmeri bilong bihainim Krais, na yumi askim Jisas long stap pas wantaim yumi tasol yumi yet i no stap pas wantaim em olsem na pasin na wokabaut bilong yumi i no save kamap gut.

Bikos yumi i no stap pas wantaim em yumi kamap olsem han bilong diwai wain i drai pinis.

Fr. Paul Liwun SVD