WANPELA intenel komiti bung bilong Ivengelikol Luteran Sios bilong Papua Niugini (ELC-PNG) Papua Distrik i makim pastaim asisten presiden Pasto Nathan Denmark long kisim ples bilong Reveren Pasto Gundu Kagl husat i bin dai long las mun.

ELC-PNG Papua distrik opis i tok bihain tasol long Rev. Kagl i dai, ol lida bilong distrik i bung long Mas 27 long makim nupela presiden tasol ol i mas bihainim lo bilong sios olsem na Pasto Denmark bai stap olsem ekting tasol pastaim.

Ol sios lida i makim Pasto Denmark olsem ekting na Pasto Basake Bafinuc bai kamap asisten presiden long taim ELC-PNG Het Bisop Rait Reveren Bisop Dokta Jack Urame i kam long instolesen bilong tupela long Kirap Bek (Resurrection) sios long Gerehu, Pot Mosbi long Me 2.

Pasto Denmark tokim midia olsem bihain long instolesen em bai fokas tasol long pinisim ol wok leit Rev. Kagl i bin plenim.

Em i tok bikpela tingting bilong em long wok bilong Sinod bilong ELC-PNG we bai kamap long Pot Mosbi long Janueri 2022. 

“Wanpela tingting em long brukim Papua distrik i go kamap tupela o foapela moa distrik bilong ELC-PNG long ol inap helpim ol kristen gut,” Pasto Denmark i tok.

Papua distrik em i bikpela distrik bilong Luteran sios na i gat sikispela provins na em i hat long wok misin olsem na dispela tingting bai kamap long Sinod. Nau yet, distrik i statim seket sistem long Oro, Milen Be, Galp, Westen, Mosbi Not Is, Cape Rodney na Mosbi siti long traim aut plen.

Opis i plen olsem mas i gat 50-pela ol delegeit bilong wan wan long ol 17-pela distrik bilong sios i mas kam na nogat man mas wokabaut i kam, olgeta mas kisim balus na kam long Pot Mosbi long sinod bikos long COVID-19 protokol sios i laikim 50 deleget tasol.

Bihain long Sinod long Papua distrik konfrens long mun Septemba 2022 bai ol i makim nupela distrik presiden tasol long nau Pasto Denmark bai stap olsem ekting tasol.

Joseph Dawai i raitim