Em i bikpela samting long wokbung wantaim ol meri na ol man wantaim long senisim ol pasin we i save daunim ol meri insait long haus.

Program Menesa bilong CARE International, Elsie Mongoru i mekim dispela toktok insait long wanpela bung namel long ol Pacific Women Sapot Yunit wantaim CARE Papua Niugini na Vanuatu Skills Partnership las wik long makim 14 Triennial Konprens bilong Pacific Women.

“Mipela i save olsem ol strongpela bilip bilong kalsa na ikonomi long wok bilong man na meri i save daunim ol meri insait long haus, komyuniti na long wok ples tu. Olsem na mipela i save wokbung wantaim ol koperesen, ol wan wan, na ol famili long senisim ol tingitng na lukluk bilong ol, ol pasin bilong ol na ol eksen bilong ol,” Mis Mongoro i tok.

“Em i bikpela samting long wokbung wantaim ol man na ol meri wantaim long senisim tingting bilong ol insait long haus.

“Ol program bilong mipela i soim olsem ol pasin we i save bagarapim na daunim ol meri i ken senis. Mipela i wok long mekim klia ol wok bilong meri insait long haus. Mipela i strongim ol man tu long kisim sampela wokmak insait long haus na mekim na sapotim ol meri bilong ol long mekim disisen tu.”

Long wankain taim, Dairekta bilong Vanuatu Skills Partnership, Fremden Shadrack i toktok long ol gutpela samting bilong meri i gat pawa.

“Taim ol meri inap long luksave long olgeta strong bilong ol, kantri bilong yumi bai benefit long dispela. Yumi nidim man na meri wantaim we i gat skill na strong long stap long strong bilong yumi yet olsem kantri na i gro olsem kantri,” Mista Shadrack i tok.

Rebecca Negere i raitim