LONG Fraide 16 Epril i go inap long Sande 18 Epril, ol yangpela long tripela sios bilong ol  Salvation Army long Lae i mekim kibung long kirapim bek laip bilong ol wantaim beten.

Ol yangpela bilong Eriku sios, Bekrot sios na Ten siti sios wantaim ol pikinini bilong ol wokmanmeri bilong Lae Praimeri skul i kamapim dispela bung long Tent siti sios.

“Insait long dispela tripela de, mi amamas long lukim ol yangpela bilong mipela i insait stret long beten na lotu,” Pasto Ruth Kohe i tok.

Pasto Ruth na man bilong em Pasto Ramson Kohe i go pas long dispela bung we samting olsem 150 yangpela husat krismas bilong ol i olsem 12 na i go antap i stap long en.

Pasto Ruth i tok olsem bun tingting bilong dispela bung em olsem Reviving our Prayer Lives (Kirapim bek pasin bilong yumi long beten) long wanem, planti yangpela long nau i lusim pasin bilong beten.

Em i tokim ol yangpela olsem, beten tasol bai senisim laip bilong yumi olsem na ol i kisim gutpela bel long lukim ol yangpela bilong ol i kirap long mekim olsem long moning yet i go long apinun.

Long Fraide ol i statim kibung wantaim ol welkam na introdaksen na long Sarere ol i mekim fasting na beten long moning i go pinisim long nait wantaim prea konset.

Long Sande ol i pasim kibung na pinisim wantaim komitmen sevis long putim olgeta yangpela i go bek long han bilong God.

Pasto Ruth i tok, “Ol mama papa tu i bin stap bilong strongim ol yangpela bilong ol long dispela taim. Em i gutpela tru long wanem yumi laik bai ol yangpela manmeri i mas stap strong na karim hevi long dispela taim.

Em i tok moa olsem, em gutpela tru long lukim ol nupela yangpela husat i joinim grup bilong ol yangpela nau tasol i kirap hariap long singaut bilong God.

“Dispela tripela de i no givim strong long ol yangpela tasol, dispela tripela de i givim strong long mipela ol mamapapa tu,” Pasto Ruth i tok.

Em i tok moa olsem ol i kisim bikpela blessing long dispela tripela de tu long lukim ol arapela yangpela man i long strit long Tent Siti i kam na joinim ol.

Long dispela taim tu Salvation ami wan sios na pren bilong Pasto Rut na Pasto Remson long Australia i donetim 120 skul buk long Salvation Army Elementeri skul long Tent Siti.

Penelope Aimari i raitim