NUPELA haus karim long Dirima insait long Gumini, Simbu bai helim ol mama long karim insait long wod we ol helt woka husat i gat trening i ken sapotim mama long karim bebi bilong ol.

Dispela em ol tingting komyuniti helt woka husat i lukautim Dirima Komyuniti Edpos, Maria Ben, i givim long ol bos bilong em taim tupela bos meri bilong Katolik Helt i go lukim na inspektim dispela haus karim wantaim narapela general wod long Tunde.

Nupela haus karim wod i gat sevenpela rum olgeta wantaim rum bilong karim. I gat tupela toilet na i gat hat na kol wara wantaim bilong waswas.

Haus karim ya em Dirima peris Pater Pita Kim (SVD) i kamapim tingting na haus i kamap long namel bilong las yia.

Pater Pita Kim i bin askim ol lain famili bilong en long Saut Korea na long United States long helpim em wantaim mani long mekim kamap dispela haus karim.

Pater Kim i tok tingting bilong sanapim haus karim i kamap taim em i lukim ol mama long ples i panim hat long go long bikpela haus sik long Gumine sab helt senta or Kundiawa haus sik long karim ol bebi bilong ol.

Long go long Gumine em tu kilomita mile, na go long Kundiawa em bai kostim K10 or moa long kalap long PMV ka. I go long 33 kilomita mail Gumine – Kundiawa rot.

“Mi lukim dispela em wanpela bikpela nid bilong ol mama. Olsem na mi bin askim ol famili memba bilong me na ol i helpim mi wantaim mani long sanapim dispela haus karim. Dispela haus karim em bai wanpela presen bai mi wantaim ol lain bilong mi long Saut Korea baiigivim long ol pipel bilongDirima, na tu ol narapela komyuniti i stap klostu long Dirima,” Pater Kim i tok.

Pater Kim husat i wok misen nau long faivpelakrismas long Dirima i stap 19 krismas olgeta long Papua Niugini na Kim i bilong oda bilong Divain Wod Misineri.

Pater Kim i tokim tupela bosmeri bilong Katolik Helt bilong Simbu,

Erikeve Kiae husat i kodineta bilong rurel helt na Margret Drekori, husat i edministreta bilong Mingende rurel haus sik olsem ol i mas kamapim posisen bilong nes long kam wok long haus karim long Dirima Komyuniti Etpos.

Mis Erikeve Kiae bihain long em i inspektim haus karim i tok tupela nes bai i ken kam wok long Dirima na tok tenkyu long Pater Kim na tu ol pameli long Saut Korea husat i givim mani long kamapim dispela haus karim.

Pater Kim i to em bai givim haus karim i go long Katolik Helt sevis bihain long dedikesen na blessing bai i kamap long mun Me

Ennio Kuble i raitim