KLOSTU long hap bilong namba bilong ol meri insait long ol developing kantri olsem Papua Niugini i no gat rait long mekim disisen long slip wantaim man bilong ol, yusim  ol samting bilong pasim bel o ol i kolim kotresepsen na i go kisim helt kea.

Dispela infomesen i kam long wanpela ripot bilong UNFPA ol i kolim State of World Population we i kamaut long las wik. State of the World Population em i wanpela pablikesen bilong UNFPA we i save kam aut long wan wan yia na em i save toktok long ol hevi bilong ol seksual na riprodaktiv helt na rait na putim kam ples klia.

“Dispela toktok olsem klostu long hap bilong namba bilong ol meri i no inap long mekim disisen long bodi bilong ol yet long sapos ol i laik slip wantaim man, yusim kontresepsen o i go kisim helt kea inap long mekim mipela olgeta i belhat,” Ekseketiv Dairekta bilong UNFPA, Dokta Natalia Kanem i tok.

“Bikpela samting em yumi luksave pinis olsem ol handret bilong ol milien meri na pikinini meri i no bosim bodi bilong ol yet. Ol arapela i bosim laip bilong ol.”

Long namba wan taim, wanpela ripot bilong ol United Nations i lukluk long independen bilong bodi: long no ken pret long vailens o larim arapela i mekim disisen bilong yu, tasol yu yet i gat pawa  long mekim disisen long bodi bilong yu.

Dispela liklik mak tasol bilong independens bilong bodi i gat planti nogut bilong en long laip bilong ol meri na ol pikinini meri. Ol dispela nogut i ken daunim ikonomik prodaktiviti na daunim ol skil we i ken kamapim planti kost long kisim helt kea na kot sistem.

Insait long dispela ripot, UNFPA i painimaut olsem ol meri i gat bodi bilong ol tasol ol i nogat rait long mekim disisen antap long dispela bodi bilong ol.

Ripot tu i soim UNFPA i skelim ol pawa bilong ol meri long mekim ol disisen long bodi bilong ol yet na ol lo bilong kantri we i sapotim o egensim rait bilong meri long mekim disisen long bodi bilong ol. Ol data na infomesen insait long dispela ripot i soim strongpela link namel long ol lain i gat pawa long mekim disisen na ol lain i gat bikpela save.

Rebecca Negere i raitim