OLSEM 77 sios grup insait long Anglimp-Saut Wagi ilektoret bilong Jiwaka provins i amamas long lokol Memba Joe Kuli long sapotim ol.

Ol ekseketiv bilong Anglimp-Saut Waghi sios asosiesen i tok tenkyu i go long Mista Kuli bihain long distrik tresera Paul Kuk i givim K400,000 sek long ol long 1 Epril.

Sios asosiesen siaman Reveren John Oi bilong Asembli ov God sios i kisim maus bilong ol sios pasto, lida na kongrigesen na tok tenkyu long gutpela pasin distrik atoriti i mekim.

"Mista Kuli i bin brukim wan wan ofa mani na i bin givim long olgeta sios stat long boda bilong Anglimp-Saut Wagi na i go long Westen Hailens na tu long bodi bilong Simbu boda,” ol sios ekseketiv i tok olsem.

“Memba i givim mani stat long 2018.

"Dispela K400,000 em tait bilong las yia (2020). Bilong dispela yia 2021 i stap, ol sios bai kisim yet," tresera Kuk i tok.

Reveren Oi i tokaut olsem pasin we MP bilong ol na vais minista bilong Woks na Implementesen i mekim i soim olsem Mista Kuli i gat luksave long bikpela wok ol sios i bin wokim insait long distrik na provins.

"Mipela i no save lukim wanpela lida i givim mani long ol sios tasol Kuli em narapela kain man,” Reveren Oi i tok.

“Mani bilong sios, dispela memba i givim stret.

"Em i mekim gut na mipela i wanbel tru long em long em i ken go het long gutpela wok bilong em.

"Sapos olgeta 110 memba long palamen i mekim olsem, kantri bai senis.”

Sios asosiesen seketeri Pasto Peter Wak bilong EBC sios i amamas olsem memba i no givim sapot long wanpela hap tasol.

"Olgeta sios insait long ilektoret i kisim skel na i amamas," Mista Wak i tok.

Hoffman Gulgarye i raitim