Nau yumi kamap long namba tri wik bilong Ista. I gat kain kain stori bilong selebresesn bilong Ista long dispela yia.

Mi bilip yumi olgeta i no selebretim Ista olsem taim bipo.

Tasol yumi amamas yet. I gat taim bilong selebretim Ista. Planti hap bilong graun ol i nogat sans, bikos COVID-19 i pasim ol.

Long St. Marys Peris insait long Goroka taun, long mein stesen, mipela i wokim lotu bilong Holi Wik, i narakain. Mipela i gat lotu long moning na apinun. Long Ista Sande yet mipela i gat tripela Misa, long 7am, 9am na 11am.

Em i stap inap nau. i gat Misa long Sarere apinun. Husat manmeri i bihainim Misa long Sarere apinun 5pm, i no ken kam moa long Sande moning. Givim spes long narapela manmeri. Olgeta prea na rit long Sarere apinun em i rit bilong Sande tasol.

Mi bilip inap nau sampela bilong yumi i bung na stori long selebresen bilong Ista bilong yumi yet.

Olsem ol disaipel i save bung na stori Jisas i kirap pinis long dai. Tasol sampela i gat tupela bel yet, olsem na Jisas i bin soim em yet planti taim long ol, bilong strongim bilip bilong ol. Taim em i kamap long disaipel bilong em, em i save tok bel isi long ol na winim spirit bilong em i go long ol, na strongim ol long kamap witnes bilong Jisas i stat long Jerusalem na i go long olgeta hap bilong graun.

Olsem wanem yumi kamap witnes bilong Kirap bilong Jisas? Olsem wanem yumi kamap witnes bilong Ista?

Anthoni de Melo, bilong kantri India i bin mekim dispel stori. Wanpela bikpela man, em i bin stap katekumen long sampela yia i go pinis na Pater i tok olsem em i nau redi long kisim Baptais. Pater i baptaisim em.

Sampela de bihain, em i bungim pren bilong em. Em i haiden man yet, i nogat bilp long Jisas. Emi askim pren bilong em nau tasol i kisim baptais olsem: “Nau mi save! Yu tanim bel pinis na kisim nupela laip insait long Krais. Inap yu tokim mi, mama i bin karim Jisas long wanem kantri?

Man i kisim baptais nau tasol i tok, “Mi no save.” Bihain pren bilong em i askim em gen: “Sapos yu no save long ples o kantri mama bilong em i karim em, inap yu tokim mi, hamas krismas bilong Jisas taim ol i kilim em i dai? Long dispela askim tu, nupela Katolik man i tok: “Mi no save.”

Las askim bilong pren bilongem. Sapos yu no save long wanem samting mi bin askim yu, inap yu tokim mi, hamas skul bilong Jisas? Dispela askim tu man i tok “Mi no Save.

Bihain, nupela Katolik man i tokim pren bilong em; “Mi no save long ples mama i karim em, na krismas bilong em taim ol i kilim em i dai, na hamas skul bilong em….olgeta mi no save. Tasol wanpela samting mi save olsem, ‘Tripela yia i go pinis, mi save spak na kam long haus paitim meri na pikinini bilong mi. Mi tu i gat planti dinau long baim bia. Taim mi no stap long haus, meri na pikinini i save amamas. Tasol taim mi kamap long haus, ol i save pret, bikos mi save paitim meri na pikinini bilong mi.

Nau, mi nogat dinau moa. Mi no dring na spak na paitim meri na pikinini. Taim mi kam leit, meri na pikinini i save wari. Taim mi kam long haus olgeta i kam holim pasim mi na tok tenkyu bikos mi bin kam bek pinis. Dispela pasin i no bin kamap long las tripela yia.

Wanpela samting mi save na bilip em i ‘Jisas i bin senisim mi’ long kamap man bilong bel isi na sapotim na mekim gutpela wok long famili.

Maski mi no save long ples na krismas bilong mi, tasol mi bilip Jisas i senisim mi.