WANPELA Madang seminarien (sumatin i skul long kamap Katolik pater) bai kisim diakon odinesen bilong em long Vatican siti long Rom long 1 Me long neks mun.

Dispela man em Cornelius Henry Momorambi.

Em bai kisim odinesen insait long St Peter Basilica long Vatican siti yet, Rom.

Em i wanpela Papua Niugini seminarien namel long ol 25 seminarien bilong ol arapela kantri husat i redi long kisim dispela odinesen.

Long wanpela pas Asbisop bilong Madang Asdaiosis, Anton Bal i raitim i go long ol pater, relijus na ol bilip manmeri bilong asdaiosis olsem ol i mas tingim Brude Cornelius long pre bilong ol long dispela taim.

Em i tok tenkyu tu long sapot na ol pre bilong husat manmeri i bin givim na i wok long givim yet long Brude Cornelius na ol wan skul bilong em.

Bihainim rit long Gutnius we Jisas i lukim planti lain manmeri i kam long em na em i sori long ol na i tok, “Gaden wain i bikpela, pre olsem Bikpela i ken salim moa wok manmeri kamap na mekim wok.”

Em i amamas long Brude Cornelus i kisim dispela singaut na i tok biknem i mas go long God Antap.

Long wankain taim, Brude Cornelus i askim ol bilip manmeri long pre olsem em i kisim strong long mekim dispela wok.

Em i kisim strong tu long Buk bilong Joshua 1:9 we i tok: “Mi tokim yu pinis. Olsem na yu mas sanap strong na yu no ken surik long wanpela samting. Long wanem, mi God, Bikpela bilong yu, bai mi go wantaim yu long olgeta hap.”