Malahang Lutren Kongrigesen long Ridima Lutren Paris i bin Lotu na tingim wan wan laip bilong ol long las wik Sande long Lae, Morobe Provins.

Dispela taim i bin bikpela salens tru long laip bilong wan wan bilip manmeri bilong Ridima Paris taim IvanJelis Morot Haung i bin serim Tok bilong God long olgeta manmeri insait long sios na sutim bel bilong wan wan bilip manmeri.

Ivanjelis Haung i tok God i makim yumi pinis na i gat plen long laip bilong yumi wan wan taim mama i karim yumi.

Em i tok yumi olgeta wan wan God i makim yumi kamap pablik seven olsem tisa, Dokta, Nes, Pailat na planti moa wok bilong dsipela graun olsem na yumi i mas daunim yumi yet long wok wantaim gutpela pasin bilong God na bai yumi kisim bikpela blesing bilong God.

“Yumi olgeta i mas wokabaut long trupela na stretpela pasin long dispela graun. Bikos wanem samting yumi mekim long dispela graun em God lukim stap, maski yu lida, pasto na man nating God i no save kaunim long dispela inap yumi wokim gutpela wok bilong em long graun na bihain bai yumi kisim gutpela riwot long heven,” Ivanjelis Haung i tok.

Laip bilong yumi wanwan em stap long han bilong God husat i wokim kamap olgeta samting na manmeri wantaim olsem na em yet i rot, tok tru na laip we bai yumi painim heven na kamapim Kingdom bilong God long dispela graun.

“Olgeta Sande em bikpela spesel de bilong tingim God papa antap long givim dispela laip long yumi na nau yumi olgeta stap laip,” em i tok.

Paulus Tali i raitim