WANPELA bikpela na naispela haus lotu bilong wanpela peris long Madang Katolik Asdaiosis nau i kamap ples klia.

Dispela haus lotu em Santu Paul Katolik Peris long Kaminkum long Sumgilbar LLG, Madang provins.

Haus lotu i kamap ples klia bihain long ol sios memba aninit long tok orait bilong peris pris na sios kaunsil i klinim ol lain kakao i banisim na pasim dispela haus lotu long stap ples klia.

Planti ol sios memba i amamas long dispela wok na i tok ol Kristen manmeri husat i ran i go kam long NCR na Bogia rot bai save olsem Kaminkum em Katolik komyuniti i stap.

Tude taim yu wokabaut o ran long kar bai yu ken lukluk i go antap na lukim naispela kala bilong Santu Paul’s Peris i sanap sain long maunten Kaminkum.

Manmeri i harim nem Mirap Katolik peris tasol ol i no save lukim wanpela haus lotu taim ol i ran long kar o wokabaut i go kam long haiwe.

Tasol tude em i isi long lukim haus lotu na ol bilip manmeri i ken i go, kisim malolo na toktok wantaim Bikpela.

Santu Paul Katolik Peris em i lukautim ol Katolik Kristen bilipmanmeri bilong ples Mirap na ol autstesin olsem Karkum, Dimer, Basken, Sarang, Tokain, Malas na Pepaur.

Wanpela pastaim skul tisa bilong Malala, Paul Kambual i tokim Wantok Niuspepa olsem planti taim em i save ran long Madang-Bogia rot long NCR tasol em i no save wanem hap em Mirap Peris o sios graun i stap.

Tasol nau bihain long ol i rausim kakao blok em i luksave long stail haus lotu bilong peris.

Em i amamas long ol Katolik bilipmanmeri long lukautim haus lotu bilong ol na holim strong Katolik bilip.

Em i tok wok bilong bodi na spirit i go wantaim na em i amamas olsem long bilip ol manmeri bai strongim ol yet long wok bilong bodi.

James G. Kila i raitim