OL tripela Katolik Peris long Dirima, Yuri na Nondri long Gumine Distrik Simbu Provins i tok amamas long nupela bisop-ilekt bilong Kundiawa Pater Paul Sundu.

Pater Peter Kim SVD i save lukautim dispela tripela peris. Bungim tripela peris wantaim em i draipela hap tru wantaim 19 autstesin.

Taim em i kisim nius bilong Pop Francis i makim Pater Paul Sundu olsem nupela bisop bilong Kundiawa em i givim dispela tok i go aut long ol pipel bilong em long bikpela Ista Misa nait.

Ol pipel i amamas tru long dispela nius.

Long makim maus bilong ol katolik long ol tripela peris siaman bilong Dirima peris kaunsil Peter Maima i tok amamas long Pater Peter Sundu long apoinmen bilong em long kamap nupela bisop bilong Kundiawa.

Mista Maima i tok em i gutpela nius tru long wanem Kundiawa i no gat bisop bihain long sios i makim bisop Anton Bal long kamap Asbisop bilong Madang Asdaiosis. Pater Richard Wajab i lukautim Kundiawa Daiosis inap Pop i makim nupela bisop bilong daiosis las wik.

Nau long dispela taim i go long odinesen bilong Pater Sundu long kamap bisop, Mista Maima i tok ol pipel long tripela peris bai i prea long em.

Pater Paul sundu i bin kisim odinesen olsem wanpela Daiosisen pater long 2008. Em i bin wok olsem Rekta bipo bilong Good Shepherd Koles, wanpela fomesen skul bilong ol pater long Jiwaka na em i stap peris pris bilong Santu Maikel peris long Koge long taim Pop Francis i makim em long kamap bisop tripela wik i go pinis.

Ennio Kuble i raitim