Nau yumi laik harim stori bilong wanpela yanpela man i pilim hevi nogut tru long pekato  bilong em i laik wanbel wantaim God.

Wanpela taim Pasto i bungim dispela yanpela man, na stori long dispela pikinini i lusim papa na i go  pinisim olgeta mani long  laik bilong em yet.

Bihain em i stap rabis tru, na em i kisim stretpela tingting na i go bek long papa gen bilong tok sori, na papa ino rausim em. Nogat papa i bin wetim em i kambek na i amamas moa long lukim em i kambek.

Pasto i tokaut long dispela stori bilong Baibel na i tokim dispela yanpela man long bikpela marimari bilong God. Nau em i kisim bel isi liklik na em i tingting, “sapos olsem, ating God bai inap marimari long mi o.” Long neks de dispela man i kam lukim pasto gen. Pes bilong em i narakain na bikpela pret i pulap long em. Em i krai na i tok, “Mi no inap painim bel isis bilong God. Mi bin mekim bikpela rong tru. Mi bin bagarapim bilip bilong planti man. Olsem wanem na mi ken stretim dispela bikpela rong mi bin mekim? Plis yu helpim mi.” Pasto i tokim em long go bek long dispela ol man na tok sori long ol giaman tok em i bin mekim. “ Mi no inap, mi no save long ol dispela man.” Yanpela man i tok “Ating yu raitim sampela tok long niuspepa na yu tok save long ol, tok yu bin mekim bipo, em i no tru.

Yu save pinis nau, wanpela God i stap.” Pasto i tokim em olsem. “Em tu i no inap,” yanpela man i bekim tok. “Ating niuspepa ino laik prinim dispela tok. Na sapos ol i prinim, olsem wanem na mi ken save, wanwan manmeri i bin harim giaman tok bilong mi bai i ritim dispela tok nau mi raitim. Nogat, dispela bai ino inap.”

“Yes, hevi bilong yu i bikpela tru,” pasto i tok. “ Jisas em yet i bin tokaut long Luk 17: 2: “ Sapos wanpela man i mekim  wanpela bilong ol dispela ol pikinini i pundaun long sin, orait mobeta ol man i pasim wanpela bikpela ston long nek bilong em na tromoi em i go daun long solwara na bai em i dai.”

Dispela  yanpela man i harim dispela tok na em i guria na i tok, “ I luk olsem mi nogat rot moa. Mi man bilong lus olgeta.” Nau pasto i kirap na i tok, “Pren, yu tok tru. Yu no inap stretim dispela rong yu bin mekim. Tasol wanpela i bin kam na i stretim pinis, em Jisas Krais, Pikinini Bilong God” Na pasto i ritim tok long Aisaia 53:5 Long  asua bilong yumi tasol em i bin kisim bagarap. Ol i bin paitim em nogut na skin bilong em i bruk nabaut, na long dispela pen em i karim, em i mekim yumi i kamap orait gen, na yumi stap gut tru.

Bikpela amamas tru nau i pulap long dispela yanpela man. God i opim ai long bel bilong em na em i  lukim tru, Jisas i bin dai long sin bilong em, long marimari bilong God em i kamap nupela man tru.