KADINAL John Ribat i bin holim wanpela pres konfrens long Trinde 31, Mas 2021 na mekim strongpela toktok long olgeta pipel bilong Papua Niugini long harim tok na bungim han wantaim long daunim COVID-19 long kantri.

COVID-19 i kamap strong nau long kantri na moa long 5, 000 manmeri i kisim dispela sik. Long dispela taim 50 pipel i dai pinis long COVID-19 na em i taim kantri i mas sanap wantaim na adresim dispela hevi.

“PM James Marape i kisim veksin pinis na mi tu bai kisim dispela veksin. Mi askim olgeta manmeri long kisim veksin bikos em bai strongim imiun sistem long bodi bilong yumi. Em i no samting bilong pretim. Dispela veksin em i 70 pesen ifektiv ,” Kardinal i tok.

Em i askim olgeta pipel long harim tok na bihainim “nupela pasin” bilong werim mask, stap longwe long ol arapela na wasim han wantaim senitaisa olgeta taim.

Em i tok moa olsem long dispela taim we i gat planti kain kain infomesen i wok long kamap long sosol midia, Kardinal i askim ol pipel long harim tok we i kam long maus bilong Kontrola, Gavman na World Health Organization (WHO). Em ol tasol bai stiam yumi na helpim yumi long paitim COVID-19.

Long dispela taim tu kantri i redi long selebretim Ista. Kardinal i askim olgeta haus lotu i mas gat 50 manmeri tasol i selebret. Em i toksave pinis long olgeta pater na pasto long olgeta sios i mas lukluk long namba bilong ol manmeri na pikinini long ol haus lotu bilong ol na kontrolim ol.

Bai nogat nomol prosesio bilong stesin ov da kros.

“Dispela em bikpela salens tru long yumi olgeta na yumi mas wokbung wantaim long daunim dispela sik,” em i tok.

Em i tok moa olsem bai gat brodkas bilong Ista program Misa long NBC na ol arapela stesin sapos yu no inap long kamap long ples bilong lotu na selebretim Ista.

Kardinal i tok tenkyu long helpim bilong Australia na ol arapela kantri i kam long PNG. Em i tok PNG i mas lukim dispela na amamas  long kisim veksin bilong helpim long daunim dispela sik.

“Yumi mas wokbung wantaim ol intenesenel komyuniti long traim na daunim spred bilong dispela sik nogut,” em i tok.

Carolyne Ketsimur i raitim