OUR Lady Queen of Peace peris long Haisi, Saut Bogenvil i stat bungim mani nau bildim nupela haus lotu bilong ol.

Olpela haus lotu ol i bin bildim namel long 1965 na 1972 na bisop i bin blesim long 1973.

Nupela haus lotu bai kostim mani mak namel long K500,000 na K700,000.

Long Haisi yet wok bilong bungim mani i stat pinis. Long olgeta Sande bihain long lotu ol mekim maket na holim ol arapela  ektiviti na ol komyuniti i sapotim. Long mun Julai bai i gat wanpela bazaar bilong Haisi peris yet na komiti bilong fanresing bai askim olgeta BKK (Bikpela Kristen Komyuniti) long kam na salim ol samting na mani ol i kisim long dispela de ol bai i givim long Fanresing Komiti. 

Komiti i askim tu ol lain bilong Haisi husat i stap long Buka na Mosbi long helpim. Ol putim tu wanpela pablik apil long Facebook long ol pipel husat i gat gutpela bel long helpim.  

Ol husat i laik helpim ken putim mani long dispela akaun; 1001407594. Akaun Nem; Haisi Parish Church Project. 

Ol pipel husat i givim donesen i ken kisim risit long hamas mani ol putim, taim ol toksave long peris pris long dispela email adres; This email address is being protected from spambots. You need JavaScript enabled to view it..  Bai peris i givim risit taim em sekim mani long akaun.

Dispela wok divelopmen bilong haus lotu i kamap taim ol pipel i lukim olsem planti wok i wok long kamap long sait bilong skul na haus sik tasol na ol i no amamas. Ol i tok Haisi em ples bilong sios pastaim na ol narapela sevis i kamap bikos long sios tasol. Olsem na ol i wanbel tru long sanapim wanpela nupela haus lotu.

Faivpela yia i go pinis peris kaunsol i bin makim wanpela projek plening komiti, long redim ol plen na stat long bungim mani bilong wokim dispela haus lotu. 

Komiti i bin singaut long olgeta famili het long kontributim K50 long olgeta 3-pela mun. Na ol i opim wanpela akaun wantaim Katolik Bisop Konprens we ol i save putim olgeta dispela mani. Ol i wok long yusim sampela long dispela mani nau long kirapim wok bilong wokim nupela haus lotu. 

Wok bilong sanapim nupela haus lotu bilong Our Lady Queen of Peace Haisi Peris, Saut Wes Dineri, Saut Bogenvil, i bin stat las yia (2020) taim ol man bilong peris yet i kisim trening long wokim brik. Ol teknikal tim bilong Bogenvil Daiosis yet i bin lainim pastaim liklik lain man na ol dispela man i bin lainim ol narapela man husat nau i wok long wokim ol brik.

Ol bai nidim moa long 5000 brik long wokim dispela haus lotu.

Olpela haus lotu i sanap yet. Bisop Leo Lemay SM, husat i bin Bisop bilong Bogenvil Daiosis long dispela taim i bin blesim dispela haus lotu long 1973. Em long taim man husat pastaim i bin Asbisop bilong Pot Mosbi, Peter Kurongku, i bin Peris Pris bilong Haisi. Tupela Bishop wantaim ol i dai pinis.

Long kisim moa save long dispela projek yu ken toktok long peris pris yet long email adres; This email address is being protected from spambots. You need JavaScript enabled to view it. o sekim long Haisi Updates Facebook pes. 

Paul Wagum i raitim