Long Fonde 4 Februeri 2021 kalenda bilong Lotu Katolik i soim stori bilong Jisas i salim disaipel bilong em long mekim wok misin.

Em i givim pawa long olgeta disaipel long autim Gutnius bilong helpim manmeri i tanim bel na rausim ol spirit nogut.

Na em i givim strongpela tok long ol i no ken karim kaikai o klos o narapela samting. Ol i go na bilip na trastim providens bilong God.

Dispela Gutnius i mekim mi tingim gen wanpela eksperiens bilong mi taim mi stap yangpela Pater na mi mekim wok long Pompabus Peris insait long Wabag Daiosis.  Em i no tupela yia yet mi stap long Papua Niugini.

Pompabus em i namba wan Peris bilong Wabag Daiosis. Em i bin kamap long yia 1945. Em i gat planti autstesen tru. Sampela i stap klostu na planti i stap longwe tru.

Wanpela taim, mi wantaim wanpela seminarian bilong Philipines husat i bin wokim Pastorel yia bilong em long Pompabus. Bihain em i go stadi long Bomana seminari na kisim ordo na kamap pater na nau em i mekim wok misin bilong em long Wabag Daiosis long lukautim Pastorel senta long Par.

Mitupela i bin stap long longwe autstesen. I gat tripela autsetesn i stap long Baiye sait long Western Hailans. Mipela kolim dispela hap em i low Lai. Mitupela i go mekim wok patrol long wanpela wik.

Bipo mipela i go, Peris pris, supervaisa bilong mipela i tokim mipela long karim planti kaikai, samting bilong slip na klos bilong senis. Planti kaikai bilong tin tu mipela i pulamapim long ruksak na karim i go. Beg i hevi tru.

Moniong stret, long 5:30am, taim ol manmeri i kam Misa long Haus Lotu, mitupela i stat long wokabaut. Kago i planti tru na hevi moa moa yet. Mipela i go i go…..na long hap we, long belotaim samting, katekis bilong Low Lai i kam bungim mipela long rot, bikos mipela i no save long rot i go insait long ples bilong ol.

Wantaim bikpela na hevi ruksak, mipela i wokabaut bihainim Katekis i go daun long bikpela wara Lai. Karen bilong wara i strong tru, na dispela wara i go daun na bungim wara Sepik.

Laki bikos katekis i kam. Em i soim rot long mipela i go daun long wara na kalap long hangamap bris ol i wokim long rop na diwai bilong bus. Strongpela nois bilong wara i mekim mipela i toktok na singaut bikmaus tru. Wan wan bilong mipela i kalap long hangamap bris na wokabaut i go long narapela sait bilong wara. Em i namba wan taim bilong mi wokabaut antap long hangamap bris, na taim mi lukluk go daun mi lukim bikpela na strongpela ran bilong wara Lai. Mi tingim olsem, sapos mi pundaun, ol i bai painim bun bilong mi tasol long wara Sepik.

Bihain long mitupela i kalapim dispela bikpela wara, mipela i brukim narapela wara gen na kalap i go antap long maunten. I nogat gutpela rot. Mipela i holim ol rop bilong diwai na kalap i go antap long maunten. Wantaim bikpela hevi bilong ruksak bilong mi, mi kalap i go antap. Na bihain mipela i wokabaut bihainim kunai ples inap mipela i kamap long namba wan viles. Mipela i kamap long 5pm long namba wan viles. Tupela nait mipela i slip long wan wan viles. I gat tripela viles we mipela I go long en.

Wanpela samting mi laik tokim yupela hia. Olgeta kaikai mipela i bin karim hevi tru long rot, mipela i no kaikai. Bikos planti kaikai bilong ples i stap, ol i bungim na redim bilong mipela. Mipela kaikai kaikai bilong ol. Slip long haus bilong ol. Taim mipela i lusim ples biling ol, mipela rausim olgeta kaikai bilong mipela na givim long ol.

Wanem samting Jisas i tokim ol disaipela bilong em, i kamap tru. Mi no bihainim, mi wari tumas olsem na mi givim hevi long mi yet.

Namba tu taim mi wokim patrol long dispela ples, mi no karim kaikai moa. Bikos, God i bin yusim manmeri bilong dispela ples long lukautim mi.