OL papamama i gat wok bilong kamapim ol gutpela Kristen famili.

Dispela em i het tok we Pater Michael Wiame i bin toktok long en long pestode bilong Santu Josep long Sande i go pinis.

Pater Michael Wiame bilong Kundiawa Daiosis i bin givim tok skul bilong em long Santu Josep Katolik Sios; wanpela pikinini sios bilong Dirima tri-in-wan peris insait long Gumine Distrik, Simbu Provins.

Haus lotu i bin pulap stret. Ol pipel i kam olsem long Dirima, Nondri na Yuri. Pater Wiame i salensim ol long bihainim laip bilong Santu Josep, man bilong Maria, Mama bilong Jisas.

“Santu Josep em olgeta taim i save lukautim gut pikinini Jisas na mama bilong em Maria. Santu Josep i save givim tupelo, kaikai, wara, ples bilong slip, was long ol long birua na save oltaim laik long lukim Jisas i stap amamas oltaim long laikim bilong familim,” em i tok.

Long pasin bilong stap wantaim na wok bung wantaim, Pater Wiame i tok olsem pasin bilong serim wok na serim samting em i wanpela gutpela rot bilong kamapim wanpela gutpela famili. Na tu em bai isi long lainim ol pikinini long pasin bilong lotu na stap olsem ol gutpela pikinini.

“Nau long taim bilong bikpela sik, ol papa i mas sanap strong long banisim ol famili bilong ol long kisim dispela sik na ol arapela sik tu.

Ol papamama mas stap longwe long ples bilong pilai laki, na ol bikpela bung, na ol i mas lainim ol pikinini bilong ol long ol rot bilong abrusim dispela sik COVID-19.  Na tu lainim ol long no ken mekim ol bikhet pasin.”

Pater Wiame em wanpela Daiosisen pater husat i lukautim Yomba peris long Gembogl Distrik.  Em I siaman tu bilong Katolik Edukesen Bod na em i save tis tu long Good Shepherd Koles, skul bilong redim ol yangpela man husat i laik kamap pater.

Long dispela pestode bilong Santu Josep, 14 pikinini i kisim baptais, 8 bilipmanmeri i kisim komunio namba wan taim na 3-pela marit i kisim blesing bilong marit. Pater Peter Kim, Peris Pris bilong dispela peris i givim dispela ol sakramen.

Bihain long dispela lotu, olgeta kongrigesen i amamas wantaim long wanpela bikpela kaikai long pinisim olgeta amamas bilong dispela dei.

Ennio Kuble i raitim