MASKI ren long Pam Sande moning ol Kristen long Santu Teresia Katolik Sios long Kamkumung long Lae i no wari. Ol i kamap long bikpela Misa bilong Pam Sande.

Tasol i no olgeta Katolik Kristen inap kamap long dispela taim. Bihainim ol tambu bilong COVID-19 sios inap larim 50 pipel tasol long wanpela taim.

Bisop bilong Lae Rosario Menzes i toksave pinis long ol pipel bilong em long harim tok na bihainim ol mesa bilong COVID-19 long abrusim dispela sik na moa yet long dispela taim bilong Holi Wik.

Misa bilong Pam Sande i save bihainim wokabaut bilong Jisas i go insait long Jerusalem olsem na ol Misa long dispela taim i save stat ausait long haus lotu na go insait.