PNG Kaunsil bilong ol sios (PNGCC) i givim sampela mesa bilong ol sios long bihainim long abrusim sik COVID-19.

Seketeri Jeneral Rev. Roger Joseph i tok COVID-19 em i no giaman samting. Em i trupela sik na i stap pinis long ol komyuniti bilong mipela.

Em i tok ol pipel i mas harim tok bilong ol lida na atoriti na bihainim. Ol i mas helpim tu long givim stretpela na trupela infomesen.

Ol pipel husat i pilim sik i mas no ken go long lotu, em i tok.

Long ol pasto na pris em i tok ol i mas skelim ol sevis bilong lotu long de na larim 40 o 50 kristen tasol i ken bung na lotu long wanpela taim. Bihain long ol lotu no ken larim ol pipel i bung bung.

Rev. Roger i tok, “Long ol konprens na woksap namba bilong ol patisipen i no ken abrusim 50 na ol kodineta bilong ol konprens i mas traim yusim zoom tu olsem nupela nomol.”

Em i tok strong tu olsem i tambu tru nau long dispela taim long holim ol bikpela krused, konprens na rali.

Rev. Roger i tok, “Insait long ol lotu ol pasto na ol pipel i mas bihainim ol helt protokol bilong abrusim COVID-19. Ol i mas werim mask long pes, yusim han senitaisa, stap 1.5 mita longwe long narapela na no ken sekan o holimpas narapela.

“Ol sios i mas kamapim ol intanet onlain sevis. Ol i mas kamapim tu ol divosen bilong givim hop na no ken mekim ol pipel i pret long sosel midia na ol midia ol i printim.

“Olgeta Kristen i gat pasin bilip bilong ol we i stiaim wokabaut bilong ol. Em i gutpela long dispela taim long yusim tingting long painim dispela save em i hait. Olgeta pipel i mas stap was long dispela sik nogut.

“Na sapos wanpela Kristen i saspek olsem em I gat COVID-19 simtom olsem drai kus long nek, nek i sua, five o pilim hat long pulim win, ol i mas ringim COVID-19 namba 1-800200. Em i fri long mekim dispela kol, Rev Roger i tok.