Bihain Holy spirit bai i kam i stap long yupela, na yupela bai i kisim strong. Na yupela bai i autim tok bilong mi long Jerusalem, na long olgeta hap bilong Judia, na long distrik Samaria, na go inap long olgeta hap bilong graun. Aposel 1:8

Wanpela apinun Pasto i bungim wanpela spakman long rot. Dispela man i stap kalabus tru long dring strongpela dring. Pasto i  sori tru long em na autim nem bilong Jisas long em. Em i tokim spakman, “Mi laikim yu, tasol Jisas i laikim yu moa yet.”

Dispela spakman i  no laik harim tok bilong Jisas taim pasto i  autim long em. Em i tingting strong long painim wanpela rot bilong mekim Pasto i  lusim em kwiktaim. Olsem na em i tok, “Pasto, sapos tok bilong yu i no giaman na yu laikim mi tru, orait bai yu givim wanpela kis long mi.” Olaman! Givim kis long wanpela man i smel nogut tru long bia! Pes bilong spakman tu i doti nogut tru long rot na i pulap long blut, long wanem em i  bin pundaun nabaut long rot na kisim bikpela bagarap. Tasol Pasto i tingim long dispela kis Judas i  bin givim long Jisas. Jisas em i holi na klin olgeta na em i no bin mekim wanpela sin na pes bilong em tu i no bin bagarap. Na Judas i kam givim kis long Jisas bilong putim em long han bilong birua. Jisas tu i pilim narakain taim Judas i givim kis long em. Tasol Jisas i no surik. Pasto i wok long tingting long Jisas i  no bin surik long dispela kis Judas i bin givim long em, na nau em i redim em yet long givim wanpela kis long spakman.

Pasto i  sori tru long spakman na em i go putim han raun long en na givim kis long em. Wantu bel bilong dispela spakman i bruk olgeta. Em i lukim pinis, dispela Pasto i no mauswara nating long pasin bilong sori, nogat. Laip bilong em i soim klia. Pasin bilong sori na laikim tru ol arapela i stap long em.

Sampela yia bihain Pasto i go autim tok bilong God long wanpela longwe ples. Long dispela ples wanpela man i kam sekanim Pasto na i askim kwesten olsem, “Ating yu tingim yet wanpela taim yu bin givim kis long wanpela spakman, a? Dispela spakman em mi tasol.” Yes, dispela spakman i bin kamap nupela man olsem Baibel i tok, Olsem na sapos wanpela man i pas wantaim krais, orait God i mekim em i kamap nupela man tru. Harim gut. Nau olpela pasin i pinis olgeta, na nupela pasin i kamap pinis. 2 Korin 5:17

Em i lukim tru marimari bilong God long laip bilong em, na bel bilong em i pulap moa yet long tok tenkyu na amamas.

Jerry Tupex