Pot Mosbi: Ol Famili Laip Komisin bilong Pot Mosbi Asdaiosis Konprens bilong PNG na SI i opim yia bilong Famili long 14 Mas wantaim wanpela toktok bilong Amoris Laetitia, Amamas bilong Laikim. Bisop bilong Alotau, Bisop Rolando Santos i givim dispela toktok.

Bihainim astingting bilong dispela yia bilong ol bilipmanmeri, ol Famili Laip  Komisin i bungim ol het bilong ol olsem: Ol Katolik Famili bilong mipela, Santu, kamapim na salim long mekim wok na autim tok bilong God long ol famili long taim bilong bikpela sik COVID-19

Dispela yia bilong famili em stat long 19 Mas, 2021 na bai pinis long 26 Jun 2022. Papa Santu yet i bin opim dispela yia long 19 Mas 2021 na dispela i makim faivpela yia long namba wan taim ol i bin mekim toktok bilong Amoris Laetitia we i soim laikim insait long marit na famili.

Jenerel sekreteri bilong CBC, Pater Giorgio Licini i bin statim dispela progrem wantaim wanpela prea. Bihain long en, Pater Ambros Pereira i go na givim ol welkam toktok.

Wanpela mausman tu bilong dispela de em deputi bisop bilong Nesenel Katolik Famili Laip Apostelet, Bisop Rolando Santos. Em i givim ol toktok bilong Papa santu long wok bilong Amoris Laetitia, em toktok klia long laikim insait long marit na famili.

Bisop Rolando i toktok moa long nid bilong strongim famili laip apostelet, wok katekis, pastoral wokabaut na tu mekim ol bung bilong sapotim dispela ol wok. Ol toktok skul bai mipela i redim na salim aut long ol daiosis long helpim strongim ol famili bilong ol.

Long dispela program ol manmeri i bin serim ol stori bilong ol long hau ol i save stap insait long marit laip bilong ol bihainim katolik bilip bilong ol. Lucy Lavu, Joe na Caroline Aribi na Alphonse Genden i stori long hau ol i save stap wantaim ol famili bilong ol na save holimpas ol prea na sakramen olsem samting bilong katolik bilip bilong ol.

Long dispela bung tu, Bisop Francis Meli bilong Vanimo Daiosis tu i bin stap. Em i toktok long pasin bilong bung wantaim long spirit, long gat dispela laikim bilong kam bung wantaim ol arapela. Em i toktok long ol yangpela marit long go long lotu na ol i mas wok bung wantaim ol arapela manmeri long prea na singsing na strongim bilip bilong ol. Na tu bai ol i ken kamap memba bilong wanpela bikpela komyuniti.

Ol hetman na hetmeri bilong ol wan wan komisin bilong Katolik Bisop Konprens, ol wokmanmeri bilong CBC na nainpela nupela daiosisen kodineta bilong famili laip husat i wok long kisim skul long katolik famili.

Redio Maria i bin brodkastim dispela ol toktok long redio stesin bilong ol long taim dispela bung i bin kamap na tu long Facebook. Ol arapela bisop long ol narapela daiosis we ol i yusim zoom long konek kam long dispela bung em, bisop Donald Lippert long Mendi, bisop Darius Kaluza long Bogenvil, Asbisop Rochus Tatamai long Kokopo na sampela arapela moa.

Dispela program i pinis wantaim ol tok tenkyu i kam long CBC bisnis menesa, Jimmy Son. Na Pater Ambros Pereira i pasim wantaim wanpela prea.

 Jessica Oata i raitim