Dispela yia, 2021 ol misinari bilong Society of the Divine Word (ol manmeri i save em SVD) i amamas long 125 yia we ol i bin kamap long Niugini long yia 1896, na ol i bin wok namel long yumi inap nau. Dispela stori em i wanpela hap bilong dispela bikpela stori bilong laip na indai bilong ol hia long kantri bilong mipela.

 (Stori i kam long pepa Pater. Ralph M. Wiltgen, SVD i bin raitim long 1964)

Long 17 Mas 1943 planti misinari i bin lusim laip bilong ol.

Liklik taim bipo ami bilong Japan i kam long Niugini na gavman bilong Australia i laik kisim olgeta misinari i go long Austarlia, bai ol i no kisim bagarap. Tasol ol misinari i tok ol laik i stap wantaim ol manmeri ol i wok wanatim ol planti yia i go pinis na ol i laik lukautim ol.

Olsem na taim ami bilong Japan i kam long Wewak, long Desemba 18, 1942, ol katolik misinari i kisim bikpela hevi. Ol Japan i askim ol long kainkain samting. Ol i tambuim ol long mekim wok misin bilong ol. Ol i ting ol misinari i salim toksave (spai) long ami bilong Amerika na Austarlia. Planti SVD misinari i lain bilong Jemeni.

Japan na Jemeni ol i pren long pait long dispela woa. Tasol ol Japan i no trastim misinari bilong Jemeni. Na ol i no rispektim lain Jemeni ya. Planti taim ol i askim ol, “Bilong wanem ami bilong Australia i lusim yu hia? Mipela i ting yupela i spai.” 

Long dispela taim Japan i wok long lus long pait long Saut Pasifik, na ol i lusim planti samting long bikpela pait long Guadalcanal (Solomon Islands). Ol i belhat long olgeta samting.

Misinari i no save tu, olsem ami bilong Austarlia i larim sampela lain i stap, na ol i stap hait long bus long maunten i hait, na ol i salim toksave long Austarlia. Olsem na ol Amerika i save wanem hap ol lain sip bilong Japan i stap na ol balus bilong ol bomim ol sip bilong ol Japan. Olsem na ol Japan i tink, ol misinari i salim dispela toksave i go. Olsem na ol i belhat long ol.

Long Mas 15, 1943 ol Japan i tokim ol misinari, husat ol i raunim na putimi stap long Kairiru Ailan long Wewak, long kalap long bikpela woa sip, em i gat planti bikpela gan. Nem bilong dispela sip em Akikaze. Olsem na 21 SVD misinari – 1 bisop, 14 bruder na 6 pater na 18 SSpS sista i kalap long sip. Wanpela postulen bilong SSpS, Magdalena Aiwaul, em i bilong Niugini, tu i kalap. Sr Arildis, SSpS i lukautim tupela pikinini bilong Saina, em i kisim tupela wantaim long sip.  Bisop Loerks, SVD i tokim ol katekis long Kairiru long lukautim olgeta samting na stap strong, na bisop i blesim ol.

Olsem na long 3.35 pm  Mas 15, Akikaze  i lusim Kairiru  Ailan na i go long Manus. Em i go long  Lorengau  long kisim narapela Katolik na Protestan misinari long hap, em i kisim sikispela (6) Protestan bilong Liebenzeller Mission (faivpela bikpela manmeri na wanpela pikinini),  na tripela (3) Sacred Heart Misinari na foapela Misinari Sista bilong Lady bilong Sacred Heart (OLSH). Long  hap ol i kisim tu eitpela (8)  narapela  man bilong narapela kantri.

Ol i lusim Lorengau long Manus na i go long  Kavieng long Nu Ailan. Long Kavieng kepten bilong sip i kisim oda long Namba 8 Fleet Hetkwata, em i stap long Rabaul long dispela taim. Oda i tok olsem , “Yu mas kilim olgeta misinari i stap long sip.” Kepten na komanda i tingting planti long dispela oda. Ol i no laik mekim, tasol ol i soldia na ol i mas bihainim oda tasol. Planti narapela soldia i stap long sip, ol i harim ol misinari bai i go bek long kantri bilong ol na ol i mas bringim ol long Rabaul pastaim.

Long  Mas 17, 1943, ol soldia i redim olgeta samting inap long 10.00 klok long moning taim na bihain long 10.13am ol i lusim Kavieng  na ran i go long Rabaul. Kepten i tokim ol long putim enjin bilong sip long bikpela spin, bai i gat planti nois, na bai manmeri i no harim pairap bilong gan.  Olsem na, ol i kisim ol misinari antap long sip, long baksait bilong sip. Ol i redim spesel ples long hap. Mekim wanpela rot lot ples ol i stap inap baksait bilong sip, na karamapim em wantaim sel. Ol i redim wanpela ples antap we em i hangamap liklik autsait long sip.

Ol i kisim wan wan misinari, rausim klos bilong ol na karamapim ai bilong ol na kisim ol i go long baksait bilong sip. Ol i hangamapim ol pastaim na i sutim ol long gan na lusim bodi bilong ol i go pundaun long solwara. Taim ol i sutim ol long gan, ol narapela i no harim tumas bikos enjin bilong sip i mekim bikpela nois tru. Ol i mekim wankain long ol sista na ol arapela meri. Ol pikinini ol i no sutim. Ol i givim banana long ol na tromoim ol laip yet i go long solwara. Olsem na solwara i kamap, matmat bilong ol.

Olsem na long Mas 17, 1943, ol soldia bilong Japan i kilim ol 62 manmeri: 3-pela pikinini, 25 meri na 34 man. Planti bilong ol em ol katolik na ol luteran misinari na sampela ol wokman. Ol lain ol Japan i kilim i kam long 7-pela narapela kantri; 1 bilong Austalia, 1 bilong Hungari, 1 bilong Niugini, 3 bilong Austria, 3 bilong Amerika, 4 bilong Saina, 4 bilong India, 6 bilong Holland na 39 bilong  Jemeni.

            Akikaze  i kam long Rabaul long  Mas 17, long 7:06 p.m.  Bipo ol soldia i lusim sip, kepten i tokim ol,“Kilim bilong ol dispela manmeri bilong narapela kantri (misinari ) i kamap bikos bikpela oda i kam long Hetkwata. Em i samting no gut, tasol nau ol soldia i no ken toktok long dispela samting wantaim narapela.” 

Ol soldia i klinim gut ples ol i sutim misinari na mekim sampela lotu long daiman long we bilong ol yet , we ol lain Budda i mekim. Olsem na dispela stori i pinis.

Long taim bilong woa ol narapela misinari i no save wanem samting i bin kamap long Bisop Loerks na lain misinari bilong em. Bihain long woa tasol ol lain soldia bilong Amerika i painim ol soldia bilong Japan husat i brukim lo na mekim pasin nogut. Ol i painim sampela lain soldia husat i bin stap long Akikaze long 17 Mas 1943 na ol i kamautim dispela stori. Long 1947 tasol ol lain SVD and SSpS i lainim wanem samting i bin kamap long pater, bruder na sista bilong ol. Long matmat long Alexishafen ol i putim tupela ain plet wantaim nem bilong ol misinari husat indai long woa, na lain i bin indai antap long sip Akikaze nem bilong ol i stap long en tu.